सञ्चारमाध्यमका समाचारलाई चासोका साथ ‘फलो’ गर्छु : सिडिओ

१३ मंसिर, हेटौँडा । मकवानपुरमा भर्खरै सरुवा भई आएका प्रमुख जिल्ला अधिकारी नारायणप्रसाद शर्मा दुवाडीले सञ्चारमाध्यमका समाचारलाई चासोका साथ ‘फलो’ गर्ने बताएका छन् । सोमबार सञ्चारकर्मीसँगको परिचयात्मक कार्यक्रममा प्रजिअ दुवाडीले जिल्लाका सञ्चारमाध्यममा आएका समाचारलाई गम्भिरतापूर्वक पछ्याउने बताएका हुन् ।
संचारमाध्यमले उजागर गरेका कमी कमजोरीबारे सम्बन्धित पक्षलाई ध्यानाकर्षण गराई सुधारका लागि प्रयास गर्ने उनले बताए । प्रधानमन्त्री कार्यालय अन्तरगतको ‘हेल्लो सरकार’ मा रहँदाको आफ्नो अनुभव सुनाउँदै प्रजिअ दुवाडीले जिल्लाबासीका समस्या समाधानका लागि आप्mनो कार्यकाल खर्चिनेमा जोड दिए । उनले समाजमा भएका सकारात्मक कामको प्रवद्र्धन र कमी कमजोरीको सुधारका लागि आफु सधैं अग्रसर रहने बताउँदै यसमा सञ्चारमाध्यमको सहयोग रहने अपेक्षा गरे । उनले सूचनाको हक कार्यान्वयनका लागि आफुले पहल रहने उनले बताए ।
कार्यक्रममा नेपाल पत्रकार महासंघका पूर्व केन्द्रिय सदस्य प्रताप विष्टले मकवानपुरमा सुगम भन्दा दुर्गम क्षेत्र बढि भएकाले भुगोलबारे अध्ययन गरेर काम गर्न सके सफलता हासिल गर्न सकिने तर्फ प्रजिअ दुवाडिको ध्यानाकर्षण गराए । उनले सकारात्मक काममा मकवानपुरे सञ्चारकर्मी सधैं प्रशासनको पक्षमा रहने भन्दै जनताको हितमा बढि समय खर्चिन आग्रह गरे । कार्यक्रममा नेपाल पत्रकार महासंघ मकवानपुरका पूर्व अध्यक्ष राममणी दाहालले प्रजिअले जिल्लामा सबै क्षेत्रबीच समन्वयको भूमिका निर्वाह गर्नुपर्ने भन्दै प्रजिअले दृढताका साथ काम गर्दा अन्य सरकारी निकायको काममा समेत सुधारात्मक संकेत देखिनेमा जोड दिए ।
कार्यक्रममा सहायक प्रमुख जिल्ला अधिकारी हरिप्रसाद पन्त, नेपाल पत्रकार महासंघ मकवानपुरका सचिव कृष्ण सारु मगरसहित मकवानपुरमा क्रियाशिल छापा एवं विद्युतिय सञ्चारमाध्यममा कार्यरत संचारकर्मीहरुको सहभागिता रहेको थियो ।