जनहितको सार्वजनिक सुनुवाई

भीमसेन पौडेल
१४ मंसिर, हेटौडा । हेटौडा–२९ बस्तीपुरमा रहेको जनहित सामुदायिक वन उपभोक्ता समूहले मंगलवार सार्वजनिक सुनुवाई तथा जनलेखापरीक्षण कार्यक्रमको आयोजना गरेको छ । गत आव ०७२/०७३ मा सम्पन्न गरेका कामहरु र चालु आव ०७३/०७४ मा गरिने सामुदायिक वन सम्वन्धि क्रियाकलापहरको बारेमा जानकारी दिन सार्वजनिक सुनुवाई कार्यक्रमको आयोजना गरिएको हो ।

  कार्यक्रममा समूहका कोषाध्यक्ष अमृत पाठकले गत आव ०७२/०७३ को लेखापरीक्षण प्रतिवेदन र चालु आव ०७३/०७४ को लागि  करीव २८ लाखको अनुमानित बजेट प्रस्तुत गर्नु भएको थियो । समूहले गत आवमा करीव ८१ लाखको कारोवार गरेको थियो । यस आवमा वन व्यवस्थापन, वृक्षारोपण, तारवार, कार्ययोजना नवीकरण, आयआर्जन, अतिक्रमण नियन्त्रण, संस्थागत विकास, सामाजिक विकास निर्माण लगायतका कामहरु गरिने समूहकी सचिव ओममाया बत्तौलाले जानकारी दिए ।

कार्यक्रममा उपभोक्ताहरुले वनको व्यवस्थापन, चोरीनिकास नियन्त्रण, वनपैदावार वितरण प्रणाली, आयआर्जन, वनको रेखदेख लगायतका विषयहरुमा कार्यसमितिले विशेष ध्यान दिनु पर्नेमा जोड दिएका थिए । समूहका अध्यक्ष मनहरी वर्तौलाको अध्यक्षतामा भएको कार्यक्रममा सामुदायिक वन उपभोक्ता महासंघ,मकवानपुरका महासचिव शम्भुप्रसाद न्यौपाने, समूहका पूर्व अध्यक्ष अक्कलबहादुर जिम्मा, सल्लाहकार हरीप्रसाद पण्डित, हरीवंश भेटवाल, संचारकर्मी भीमसेन पौडेल लगायतकाले मन्तव्य व्यक्त गरेका थिए । ४ सय २ हेक्टर क्षेत्रफल रहेको यो समूहमा करीव ७ सय उपभोक्ता रहेका छन ।

 कार्यक्रममा वन कार्यालयका प्रतिनिधी, विभिन्न संघसंस्थाका प्रतिनिधी, उपभोक्ता र संचारकर्मीहरुको सहभागिता रहेको थियो ।