मउवासंघद्वारा प्रजिअ र कार्यकारी अधिकृतको स्वागत

१६ मंसिर, हेटौँडा । मकवानपुर उद्योग बाणिज्य संघले मकवानपुरका प्रमुख जिल्ला अधिकारी र नगरपालिकाका कार्यकारी अधिकृतलाई विहिबार स्वागत गरेको छ । भर्खरै सरुवा भई आएका प्रजिअ नारायणप्रसाद शर्मा दुवाडी र कार्यकारी अधिकृत कृष्णप्रसाद पाण्डेलाई स्वागत गरेको हो ।

कार्यक्रममा बोल्दै प्रजिअ दुवाडीले जिल्ला प्रशासन कार्यालयले व्यवासयिक क्षेत्रको प्रवद्र्धनमा सहयोग गर्दै बताउँदै नियमक निकायको भूमिकालाई सधैं ख्याल गर्ने प्रष्ट पारे । कार्यक्रममा नगरपालिकाका कार्यकारी अधिकृत कृष्णप्रसाद पाण्डेले जिल्लाको स्थानीय निकाय र व्यवसायिक संस्था उद्योग बाणिज्य संघबीच सहकार्यमा जोड दिंदै दुबैको समन्वयबाट काम गर्न सके बजार क्षेत्रमा सुधारका काम गर्न सकिने बताए ।

संघका पूर्व अध्यक्ष अरुणराज सुमार्गीले बजार क्षेत्रमा लागुऔषध दुव्र्यसनीको समस्या बढ्दै गएकोले यसको न्यूनिकरणका लागि प्रशासन र नगरपालिकाले नीजि क्षेत्रसँग सहकार्य गर्न सके सामाजिक क्षेत्रमा समेत योगदान पुग्ने बताए । संघका अध्यक्ष राजकुमार न्यौपानेको अध्यक्षतामा भएको कार्यक्रममा महासचिव महेन्द्र राउत, उपाध्यक्ष कृष्ण अग्रवाल, लवशेर विष्ट, कोषाध्यक्ष प्रमोदसिंह रानाभाट, पश्चिमी क्षेत्र समितिका अध्यक्ष गोविन्द रिजाल लगायतको सहभागिता रहेको थियो ।