प्रदेश सरकारलाई सेवाग्राही कार्यान्वयन इकाई स्थापना गर्न निर्देशन

९ जेठ, हेटौंडा । ३ नम्बर प्रदेश सरकारलाई सम्बन्धित जिल्लामा नै सेवाग्राही कार्यान्वयन इकाई स्थापना गर्न निर्देशन दिईएको छ । प्रदेशसभा भवन हेटौंडामा विहिबार बसेको सार्वजनिक लेखा समितिको बैठकले सरकारलाई यस्तो निर्देशन दिएको हो । 
आर्थिक मामिला तथा योजना मन्त्री कैलाश ढुंगेल, सरकारको प्रमुख सचिव आनन्दराज ढकाल र अर्थ मन्त्रालयका उपसचिव घनश्याम पन्थीलाई डाकिएको बैठकमा आगामी वर्षको नीति तथा कार्यक्रममा यो विषयलाई सम्बोधन गर्न निर्देशन दिएको समितिका सभापति न्हुक्षे नारायण श्रेष्ठले जानकारी दिए । 
बैठकमा चालू आर्थिक बर्षको राजस्व संकलन र पूँजिगत खर्चको अवस्थाबारे जानकारी लिईएको थियो । बैठकमा चालू आवमा ९ अर्ब राजस्व संकलनको लक्ष्य राखिएकोमा ७ अर्ब राजस्व संकलन हुने र पूँजिगत खर्च २०% पुर्‍याउने जानकारी दिईएको थियो । 
बैठकमा योजना स्थलगत अवलोकन भ्रमण उपसमितिले तयार गरेको प्रतिवेदन समेत बुझाईएको थियो । प्रतिवेदनमा उल्लेख भएका कर्मचारी समस्या, योजना कार्यान्वयनका चुनौति लगायतका समस्या समाधानका लागि भ्रमणबाट प्राप्त राय सुझाव कार्यान्वयन गर्न समेत निर्देशन दिएको सभापति श्रेष्ठले जानकारी दिए ।