राष्ट्रिय हितमा अहिलेको संशोधन सच्याउनुपर्छ : बाबुराम भट्टराई

२५ मंसिर, हेटौँडा । नयाँ शक्ति नेपालका संयोजक डा. बाबुराम भट्टराईले अहिले संसदमा पेश भएको संशोधन प्रस्ताव राष्ट्रिय हितमा हुने गरी सच्याउनुपर्ने बताएका छन् । 
हेटौँडामा पत्रकारहरुसँगको भेटघाटमा बोल्दै नेता भट्टराईले राजनैतिक गतिरोध अन्त्यका लागि संसदमा पेश भएको प्रस्तावलाई सबै पक्षको माग सम्बोधन र राष्ट्रिय हित हुने गरी संशोधन हुनुपर्ने बताए । उनले संशोधनका क्रममा संविधानसभाका समिति र आयोगले दिएको सुझाव अनुसार सच्याउन समेत सुझाव दिए । अहिलेको समस्याको समाधान संसदबाटै खोज्नुपर्नेमा केही दलले जनता जुधाउने काम गरिरहेको भन्दै उनले यसलाई रोक्न नयाँ शक्तिले पहल गरिरहेको बताए ।

सहमतिमा संविधान संशोधन गरी एक बर्षभित्र तीन तहको निर्वाचन एकसाथ गर्नुपर्ने सुझाव दिंदै पूर्व प्रधानमन्त्री समेत रहेका भट्टराईले ठूला दलका शिर्षनेताहरुका गैरजिम्मेवार अभिव्यक्तिले समेत संघियता कार्यान्वयनमा समस्या आईरहेको बताए । ‘पूर्वमा झापा, मोरङ, सुनसरी र पश्चिममा कैलाली कञ्चनपुरमा एक रौं दिन्न भन्ने जस्ता अभिव्यक्ति उहाँहरुले दिंदा समस्या आएको हो ।’–उनले भने । नेपालमा भएका राजनैतिक परिवर्तनमा विदेशीलाई देखाउने काम भएकोप्रति असन्तुष्टि व्यक्त गर्दै उनले नेपालका राजनैतिक दललाई कमजोर देखाउने काम कतैबाट हुन नहुने बताए ।