विश्वकप क्रिकेटः पाकिस्तानको पहिलो जित

२१ जेष्ठ, हेटौँडा । आईसीसी एकदिवसीय विश्वकप क्रिकेटको आफनो दोश्रो खेलमा पाकिस्तानले पहिलो जित निकालेको छ । पाकिस्तान घरेलु टिम इंग्ल्याण्ड विरुष्द्ध १४ रनले विजयी भयोे ।
सोमबार राति भएको खेलमा ३४९ रनको विजयी लक्ष्यसहित जवाफी ब्याटिङमा उत्रिएको इंग्ल्याण्ड ५० ओभरमा नौ विकेट गुमाउँदा तीन सय ३४ रनमा समेटिएपछि पाकिस्तान १४ रनले विजयी भयो । राम्रो सुरुवात गर्न नसकेको इंग्ल्याण्डका लागी जोय रुट र जस बटलरले उत्कृष्ट प्रदर्शन गरेपनि जित दिलाउँन सकेनन् । 
जोय रुटले १ सय ७ रन बनाए भने जस बट्लरले १ सय ३ रनको योगदान दिए । जोय रुट र जस बटलर आउट भएपछि इंग्ल्याण्ड ठूलो दबाबमा परेको थियो । इंग्ल्याण्डका अन्य खेलाडीले सामान्य प्रदर्शन गरे । 
बलिङमा पाकिस्तानका सादाब खान र मोहम्मद आमिरले दुई तथा वहाब रियाजले तीन विकेट लिए ।
यसअघि टस जितेर पहिले ब्याटिङ गरेको पाकिस्तानले ५० ओभरमा ८ विकेट गुमाएर तीन सय ४८ रन बनाएको थियो । उसले पहिलो विकेटका लागि ८२ रनको साझेदारी गरेको थियो । उसका फखर जमानले ३६ रन बनाए भने इमाम उल हकले ४४ तथा बाबर आजमले ६३ र मोहम्मद हफीजले ८४ रन थपे ।
यस्तै कप्तान सरफराज अहमदले ५५ रनको योगदान दिए । पहिलो विकेट गुमाएपछि दोस्रो विकेट पनि सस्तैमा गुमाएको पाकिस्तानका लागि आजम र हफीजले तेस्रो विकेटका रुपमा ८८ रनको साझेदारी गरे । 
इंग्ल्याण्डका लागि क्रिस वोक्स र मोइन अलीले ३–३ विकेट लिए । त्यस्तै मार्क वुडले २ विकेट लिए । (एजेन्सी)