संसद सुचारु हुने वातावरण तयार गर्नुस्ः सभामुख घर्ती

२५ मंसिर, काठमाण्डौं । सभामुख ओनसरी घर्तीले संसद सुचारु हुने वातावरण तयार गर्न प्रधानमन्त्री पुष्पकमल दाहालसँग आग्रह गरेकी छिन् । उनले दलहरुबीचको छलफललाई तिब्रता दिएर संसद सुचारु हुने वातावरण बनाउन दाहाललाई आग्रह गरेकी हुन् ।

प्रधानमन्त्री निवास बालुवाटारमा शनिबार विहान भएको छलफलमा सभामुखी घर्तीले विभिन्न विधयेक पारितको काम रोकिरहेको भन्दै यथाशिघ्र समस्या समाधानमा प्रधानमन्त्रीको ध्यानाकर्षण गराएकी छिन् । करिव एक घण्टा भएको भेटमा प्रधानमन्त्री दाहालले अहिले देखिएको समस्या समाधानका लागि छलफल भईरहेकाले छिटै अवरोध हट्न बताए । उनले आगामी संसद बैठक अघि नै ठोस निष्कर्ष निकाल्ने ढंगले पहल भईरहेको भन्दै निकास निस्कनेमा सभामुखलाई विश्वस्त पारेका थिए ।

समस्या समाधनका लागि यसअघि सभामुख घर्तीले नेपाली कांग्रेसका सभापति शेरबहादुर देउवा र एमाले अध्यक्ष केपी ओलीसँग समेत छलफल गरेकी थिईन् । एमाले, माले लगायतका केही दल अहिलेकै अवस्थामा संविधान संशोधन गर्न नदिने भन्दै निरन्तर संसद अवरुद्ध गर्दै आएका छन् भने नेपाली काँग्रेस, माओवादी केन्द्र लगायतका दल संसदमा पेश भएको प्रस्ताव पारित गराउने पक्षमा छन् । संशोधन प्रस्तावको विषयमा एमालेले संसद र सडक दुबैतर्फ आन्दोलन बढाउँदै आएको छ ।