प्रतिपक्षी दलको आवाज दबाउने प्रयत्न नगरियोसः सांसद पाण्डे

३ असार, हेटौँडा । राष्ट्रियसभामा प्रमुख प्रतिपक्षी दलका नेता सुरेन्द्र पाण्डेले सदनमा प्रतिपक्षी दलको आवाज दबाउने प्रयास गरे सडक संघर्ष चर्कने चेतावनी दिएका छन् ।
राष्ट्रियसभाको मंगलबारको बैठकमा बोल्दै नेता पाण्डेले सदनमा प्रतिपक्षी दलको मुख थुन्ने काम गरिए त्यो सडकमा गएर पोखिने चेतावनी दिए । 
सत्तारुढ दल नेकपाका नेता दिनानाथ शर्माले प्रतिपक्षी दलले संसदीय मर्यादा विपरित प्रतिनिधिसभामा प्रधानमन्त्रीलाई बोल्न नदिएको बताएपछि नेता पाण्डेले प्रतिपक्षी दलको मुख थुन्ने प्रयत्न नगर्न चेतावनी दिएका हुन् ।
उनले प्रतिपक्षीलाई सदनभित्रपनि मुख थुन्ने प्रयास गरिएको आरोप लगाउँदै, प्रतिनिधिसभामा प्रधानमन्त्रीले मात्रै बोल्न पाउने अनि प्रतिपक्षी दलले बोल्न  नपाउने ? भनि प्रश्न गरे ।  
संसदीय मुल्य मान्यताका बारेमा कसैले कांग्रेसलाई सिकाउनु नपर्ने भन्दै नेता पाण्डेले आफुहरुको धर्यता र संयंतालाई कम्जोर नठान्न चेतावनी दिए ।
सरकारले संविधान विपरित ल्याएका विधेयकका विरुद्ध जनता सडकमा ओर्लिएको र टोलटोलमा सरकारको विरोधमा प्रर्दशन भईरहेको भन्दै उनले सरकारलाई संयमित भएर संविधान अध्ययन गर्न सुझाव दिए ।
अधिकारका लागि माईती घर मण्डलामा जम्मा भएका गुठीयारमाथि सरकारले गरेको दमन विरुद्ध जनप्रतिनिधिहरुले सदनमा आवाज उठाएको भन्दै सांसद पाण्डेले संसदीय प्रक्रिया विपरित विधेयक बारे प्रतिनिधिसभामा कुरा गरियो भन्न नमिल्ने तर्क गरे ।
उनले सरकारले संविधान भन्दा बाहिर गएर सुरक्षा परिषद् सम्बन्धी विधेयक, मानवअधिकार सम्बन्धी विधेयक, सूचना प्रविधि विधेयक, मिडिया काउन्सिल विधेयक र गुठी विधेयक ल्याएको आरोप लगाए ।