प्रदेश ३ को बजेट वितरणमुखी, सांसदहरु असन्तुष्ट

९ असार, हेटौँडा । ३ नम्बर प्रदेशको आ.व. ०७६/०७७ को बजेट वितरणमुखी भएको प्रदेशसभा सदस्यहरुले गुनासो गरेका छन् ।
उनीहरुले बजेट समावेशी र आवश्यकता भन्दा पनि नेतामुखी भएको बताए । प्रदेश सरकारले यसअघि भनेको परियोजना बैंक र जनताको मागको औचित्य नदेखिएको प्रदेशसभा सदस्य कल्पना नेपालीले बताईन् । 
‘परियोजन बैंक भनिएको थियो, त्यसबाट पनि योजना छैन, जनताको आवश्यकता अनुसारको योजना पनि छैन ।’–उनले भनिन्–‘पहुँचवाला नेताहरुको खल्तिको योजना परेको छ ।’ बजेट पुस्तिकामा प्रदेश सरकारको नीति तथा कार्यक्रम विपरित बजेट राखिएको छ । नीति तथा कार्यक्रममा बजेट तुर्जमा निर्देशिका तयार गर्ने र सानातिना आयोजनामा बजेट विनियोजन गर्ने परिपार्टीलाई निरुत्साहित गर्न पचास लाख रुपैया भन्दा माथिका आयोजना मात्र छनौट गरी कार्यान्वयन गर्ने उल्लेख रहेको थियो । ‘परियोजना बैंकबाट हैन बजेट हुण्डीमार्फत आएको देखियो, यस्तो वितरणमुखी बजेटले प्रदेश समृद्ध हुँदैन ।’–प्रदेशसभा सदस्य रमेश पौड्यालले बताए । बजेट विनियोजनका क्रममा प्रदेश सरकारले आफ्नै नीतिलाई पनि कुल्चिएको उनको भनाई थियो ।
‘पहुँचवाला नेताहरुको नीति तथा कार्यक्रममा उल्लेख भए विपरित १० लाख रुपैंयादेखिका योजना समावेश छन् ।’–प्रदेशसभा सदस्य रजनी जोन्छे अमात्यले भनिन्–‘बजेट पूर्ण रुपमा पूर्वाग्रही ढंगले विनियोजन भएको छ ।’ बजेटले प्रदेश सरकारका मूख्यमन्त्री, मन्त्री र पहुँचवाला सांसदहरुको मागलाई सम्बोधन गरेको प्रदेशसभा सदस्यहरुको गुनासो छ । 
बजेटमा एउटै योजनालाई टुक्र्याएर बजेट वितरण गरिएको छ । डिभिजन वन कार्यालय मकवानपुरको योजनामा एक वडा १ पार्क योजनामा १०/१० लाख राखिएको छ । ‘यो बजेट प्रत्येक वडालाई बाँड्दा साँढे १९ हजार रुपैँया प्राप्त हुन्छ, यसले कस्तो पार्क बनाउने ।’–एक प्रदेशसभा सदस्यले भने । बजेट विनियोजनप्रति सत्ता र प्रतिपक्ष दुबैतर्फका प्देशसभा सदस्यहरु रुष्ट छन् ।
तर बजेटले सबै जिल्ला समेट्ने कोशिस गरेको नेकपाका प्रमुख सचेतक रामेश्वर फुँयालले बताए ।