सहकारी ऐन निरंकुश हुनै सक्दैन : सहकारीमन्त्री थानी

३० मंसिर, हेटौँडा । सहकारी तथा गरिबी निवारण मन्त्री हृदयराम थानीले सरकारले ल्याउन लागेको सहकारी ऐन निरंकुश हुनै नसक्ने दावि गरेका छन् । केन्द्रिय सहकारी दुग्ध उत्पादन सहकारी संघ लिमिटेडको २३ औं बार्षिक साधारण सभालाई विहिबार हेटौँडामा सम्बोधन गर्दै मन्त्री थानीले संसदमा पेश भएको सरकारी ऐन निरंकुश हुनै नसक्ने दावि गरेका हुन् ।

उनले बाहिर सहकारी ऐन निरंकुश आउन लागेको हल्ला चलेपनि त्यसमा सत्यता नरहेको भन्दै निरंकुशता विरुद्ध लडेका दलहरुले ल्याउन थालेको ऐन निरंकश हुनै नसक्ने बताए । उनले आउन लागेको ऐन सहकारी मैत्री हुनेमा ढुक्क हुन आग्रह गरे । उनले सहकारीकै माध्यमबाट गरिबीको अन्त्य र देश समृद्ध हुन सक्ने भएकाले यसको प्रवद्र्धनका लागि आफ्नो मन्त्रालय तत्पर रहेको बताए । उनले देशलाई दुग्ध क्षेत्रमा आत्मनिर्भर बनाउँदै निर्यात गर्न सक्ने अवस्थामा पुर्याउन सम्बन्धित सबै मन्त्रालयबीच समन्वयको खाँचो रहेको बताए ।

दुग्ध सहकारीले देशमा रोजगारीको अवसर सिर्जना गरेको भन्दै यो क्षेत्रलाई अनुदानमार्फत आत्मनिर्भर बनाउनु जरुरी रहेको बताए । उनले सहकारीले ग्रामिण भेगमा बैंकको सेवा दिईरहेको भन्दै यसको प्रवद्र्धनमा सरकार सचेत रहेको दावि गरे । कार्यक्रममा सांसद पशुपति चौलागाईले संसदमा प्रस्ताव भएको सहकारी ऐनमा ठूला तीन दलको साझा अवधारणा रहेको भन्दै यसले अहिले रहेका धेरै समस्या समाधान हुने बताए । उनले आउने ऐनले सहकारीका समस्या सम्बोधन हुन नसके पुनः यसलाई परिमार्जन गरेर भएपछि सहकारीको हितमा सदुपयोग गरिने दावि गरे ।

कार्यक्रममा राष्ट्रिय दुग्ध विकास बोर्डका कार्यकारी निर्देशक कैलाश ढुंगेल, राष्ट्रिय सहकारी संघका संचालक बद्री लम्साल, दुग्ध उत्पादक सहकारी संघका पूर्व केन्द्रिय अध्यक्षहरु माधव कोइराला, ढाकाराम अर्याल, सेसीका कैशव कोइराला, दुग्ध विकास संस्थानका अध्यक्ष खेम थापा, पशुपंक्षी विकास मन्त्रालका सहसचिव केशव प्रेमी, पशु सेवा विभागका निर्देशक डा. विमलकुमार निर्मल, राष्ट्रिय सहकारी बैंकका संचालक रामहरी बजगाई, डेरी एशोसियसनका अध्यक्ष नरेन्द्रराज भण्डारी, सहकारी विकास बोर्डका केन्द्रिय सदस्य धर्मदत्त देवकोटा, जिल्ला दुग्ध उत्पादक सहकारी संघ मकवानपुरका अध्यक्ष बासुदेव अधिकारी लगायतले मन्तव्य व्यक्त गरेका थिए ।