शान्ति प्रक्रिया भाँड्ने चलखेल भईरहेको छ : प्रचण्ड

File Photo

२० असार, काठमाडौं । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले शान्ति प्रक्रिया भाँड्न चलखेल भइरहेको दावि गरेका छन् । उनले फाइदा लुट्न खोज्नेहरुले यसका लागि प्रयास गरिरहेको बताएका हुन् । 
समाजवादी पार्टी छाडेर नेकपा प्रवेश गरेका नेता कार्यकर्तालाई पार्टीमा स्वागत गर्दै अध्यक्ष प्रचण्डले यसबारे सबै राजनीतिक दल बेलैमा सचेत हुनुपर्नेमा जोड दिए । उनले नेपालको शान्ति प्रक्रिया विश्वमै नमूना रहेको भन्दै यसलाई विथोल्ने प्रयास भईरहेकोमा आक्रोश व्यक्त गरे । उनले यसलाई प्रतिवाद गर्ने चेतावनी दिंदै फाइदा लुट्न खोज्नेहप्रति सचेत रहनुपर्नेमा जोड दिए । उनले गणतन्त्रलाई बदनाम बनाउन तिललाई पहाड बनाउने काम भईरहेको समेत बताए । कम्युनिष्टलाई गालि गर्न र शान्ति प्रक्रियालाई भाँड्न पाईयो भने लाभ हुन्छ भन्ने सोचका साथ काम भईरहेको उनको दावि छ ।
उनले पुराना कम्युनिष्ट नेताहरुलाई समेत नेकपामा आउन आव्हान गरे । उनले  डा. बाबुराम भट्टराई, मोहन बैद्य, मोहनविक्रम सिंह, चित्रबहादुर केसी, नारायणमान विजुक्छे लगायतलाई समेत पार्टी एकताका लागि आग्रह गरेका छन् । उनले उनीहरुलाई पार्टीले सम्मान दिने समेत दावि गरे ।