चिल्ड्रेन पार्कमा सुबिधा सम्पन्न पुस्तकालय स्थापना हुने

४ पुस, हेटौंडा । हेटौंडा-४ मा रहेको बाल उद्यान (चिल्ड्रेन पार्क) मा सुबिधा सम्पन्न पुस्तकालयको स्थापना हुने भएको छ । ब्रम्हकुमारी राजयोग सेवा केन्द्र हेटौंडाको व्यवस्थापनमा सञ्चालित चिल्ड्रेन पार्कमा सुबिधासम्पन्न पुस्तकालयको स्थापना गर्न लागिएको हो ।

चिल्ड्रेन पार्कमा रहेको भवनको तेस्रो तल्लामा सबै उमेर वर्गलाई लक्षित गरी सुबिधा सम्पन्न पुस्तकालयको स्थापना गर्न थालिएको ब्रम्हकुमारी राजयोग सेवा केन्द्रले जनाएको छ । सोमबार पत्रकार सम्मेलनको आयोजना गरी पुस्तकालयको बारेमा जानकारी दिइएको छ ।

अमेरीकामा बस्दै आएका मौसमी श्रेष्ठको नेपाल जर्नी नामक सहयोगी संस्थाले करीब ४५ लाखको लागतमा पुस्तकालय स्थापना थालिएको छ । यही फागुन मसान्तसम्म निर्माण सम्पन्न गर्ने गरी पुस्तकालयको काम थालिएको ब्रम्हकुमार बिजयराज सिग्देलले बताए ।

हरेक प्रकारका करिब एकहजार दुईसय पुस्तक राखिने पुस्तकालयमा सबै उमेर, वर्ग समुहलाई अध्ययनको लागि सहयोगी बन्ने उनको विश्वास छ । करीब दश महिना अघिदेखि चिल्ड्रेन पार्कको व्यवस्थापन सम्हालेको सेवा केन्द्रले बाल उद्यानलाई विकास गर्दै ई–लाईब्रेरी समेत सञ्चालन गर्दै आएको छ ।

१२ ओटा कम्प्युटर रहेको इ–लाईब्रेरीमा कक्षा २ देखि १२ सम्मका बिद्यार्थीलाई आवश्यक पाठ्यक्रम समावेश गरीएको ब्रम्हकुमारी राजयोग सेवा केन्द्र चिल्ड्रेन पार्ककी ब्रम्हकुमारी बिष्णु दिदीले बताईन् । 

तस्बिर सौ.- पुष्पराज अधिकारी