सूचना नदिए अब कारवाही प्रक्रियामा जान्छौं : प्रमुख सूचना आयुक्त बास्कोटा

८ पुस, हेटौँडा । राष्ट्रिय सूचना आयोगका प्रमुख सूचना आयुक्त कृष्णहरी बास्कोटाले सरकारी निकायले सूचना नदिए अब कारवाही प्रक्रियामा जाने चेतावनी दिएका छन् ।

हेटौँडामा शुक्रबार भएको पत्रकार भेटघाट कार्यक्रममा बास्कोटाले सचेतनाको चरण पार गरी आयोग अब कारवाहीको प्रक्रियामा अघि बढेको बताए । विगतमा सूचनाको हक कार्यान्वयनमा धेरै चुनौति रहेकोमा अहिले कारवाही प्रक्रिया अघि बढाएपछि सूचना दिने क्रम बढेको उनको भनाई छ । उनले देशको कर्मचारीतन्त्रका कारण सूचनाको हक कार्यान्वयनमा चुनौति रहेको बताए । ‘हामीले सूचना दिए देशमा आगो बल्छ भन्ने हुटिट्याउ प्रवृत्ति कर्मचारीमा हावी भएको छ ।’–उनले भने–‘अब सूचना नदिए दण्डित गरिन्छ ।’ बास्कोटाले राणाकाल र पञ्चायतमा राज्यले नै सूचना लगाउने गरेकोमा अहिले सूचना दिने प्रावधान रहेपनि कर्मचारीतन्त्रका कारण सूचनाको हक कार्यान्वयनमा चुनौति बढेको बताए ।

कर्मचारीतन्त्र हावि हुँदा विभिन्न बहानामा सूचना नदिने प्रवृत्ति बढेको उनको भनाई छ । प्रमुख सूचना आयुक्त बास्कोटाले सूचनाको हक लोकतन्त्रको प्राणबायु भएकाले लोकतन्त्र जोगाउन पनि सूचनाको हक  कार्यान्वयन गर्न सबै पक्षको समन्वय जरुरी रहेको बताए । उनले सूचनाको हक कार्यान्वयनका लागि मकवानपुरमा भएका प्रयासको प्रशंसा समेत गरे ।