यातायात मन्त्री लेखकले भने-'हेटौंडाबाटै लाइसेन्स वितरण गर्नेे व्यवस्था मिलाउनुस्'

११ पुस, हेटौंडा । नेपाली काँग्रेसका केन्द्रीय सदस्य एवं भौतिक पूर्वाधार तथा यातायात मन्त्री रमेश लेखकले अहिले चलिरहेको हेटौंडा बजारभित्रको २५ मिटर सडक भत्कने बारेमा आफूले अहिल्यै केही नबुझी भन्न नसक्ने बताएका छन् ।

नेपाली काँग्रेस पार्टी मकवानपुरमा सोमबार भएको छलफल कार्यक्रममा मन्त्री लेखकले यहाँका स्थानीयको धेरै समस्याहरु अहिले सुनेकोले पहिले त्यसको सम्पूर्ण प्राविधिक पक्षहरु आधिकारिक रुपमा बुझेर केही समयमै विस्तृत निर्णय लिने बतााए ।
त्यस्तै यातायात कार्यालय हेटौंडाका प्रमूखलाई निर्देशन दिंदै मन्त्री लेखकले भने-'हेटौंडाबाटै लाइसेन्स वितरणलगायत अन्य यातायातसम्बन्धी कार्य गराउनको लागि केके समस्या छ भन्नुहोस्, म केहीदिनभित्रै सम्पूर्ण समस्या समाधान गरिदिन्छु । त्यसको लागि तपाईले मलाई समस्याहरु बताउनुहोस् ।'
छलफल कार्यक्रममा मन्त्री लेखकले विपिको सपना रहेको कान्तिलोकपथ सडक निर्माण काँग्रेस पार्टीले शुरू गरेको र काँग्रेसकै नेतृत्वमा सम्पन्न गर्ने बताए । एमाले माओवादी सरकारमा हुँदा कहिल्यैपनि यो सडकमा ध्यान नदिएको बताए ।

मन्त्री लेखकले जसरी पनि चुनाव हुन्छ र लोकतन्त्रमा चुनावको विकल्प नभएकाले चुनावको लागि तयारी गर्न जिल्लाका नेता तथा कार्यकर्तालाई आग्रह गरे ।

नेपाली काँग्रेस मकवानपुरका कार्यबाहक सभापति विष्णुप्रसाद लामिछानेको सभाध्यक्षतामा भएको छलफल कार्यक्रममा नेपाल तरुण दलका निवर्तमान सभापति एवं ललितपुर क्षेत्र नम्बर १ सांसद उदयसमशेर राणा, वाग्लुङ जिल्ला सांसद प्रकाश पौडेल, काँग्रेस मकवानपुरका निवर्तमान सभापति रघुरमण न्यौपाने, प्रमूख सल्लाहार माइकल रामचन्द्र अर्याल, सचिव आनन्द कठायत, कोषाध्यक्ष गोपीलाल विश्वकर्मा, सल्लाहाकार रिता खनाललगायत जिल्ला कार्यसमिति र नेपाली काँग्रेसका कार्यकर्ताहरुको उपस्थित रहेको थियो ।