डेंगु नियन्त्रण गर्न प्रशासनमा बैठक, यस्तो छ तयारी

२८ साउन, हेटौँडा । हेटौँडा उपमहानगर क्षेत्रमा देखिएको डेंगुको प्रकोप नियन्त्रणका लागि जिल्ला प्रशासन कार्यालय मकवानपुरमा मंगलबार बैठक बसेको छ । मकवानपुरका प्रमुख जिल्ला अधिकारी अस्मान तामाङको अध्यक्षतामा डेंगु नियन्त्रणका लागि सुरक्षा निकाय र सरोकारवाला निकायसहितको बैठक बसेको हो । 
बैठकमा डेंगु नियन्त्रणका लागि सचेतनामुलक कार्यक्रम संचालन गर्ने, डेंगुका लार्भा र प्युपको बासस्थान पहिचान गरी नष्ट गर्ने, प्रभावित क्षेत्रमा सामाजिक संस्था र क्लवसंगको सहकार्यमा स्वास्थ्य शिविर गर्ने, आवश्यक परे सुरक्षा निकायलाई परिचालन गर्ने, डेंगु परिक्षण गर्ने किटको पर्याप्त उपलव्धताका लागि उपमहानगरपालिकाले व्यवस्था मिलाउने, पत्रकार र विद्यालयका शिक्षकहरुसंग डेंगु नियन्त्रणका लागि अन्तरक्रिया गर्ने लगायतका निर्णय भएको छ । 
बैठकमा प्रदेश सामाजिक विकास मन्त्रालय, क्षेत्रीय स्वास्थ्य निर्देशनालय, जिल्ला जनस्वास्थ्य कार्यालय, नेपाल प्रहरी, सशस्त्र प्रहरी, नेपाली सेना, हेटौँडा उपमहानगरपालिकाका प्रतिनिधि र ४ नम्बर वडाका अध्यक्षको सहभागिता रहेको थियो ।
हेटौँडामा हालसम्म १ सय २४ जना डेंगुका विरामी पहिचान भएका छन् । डेंगु परिक्षण किटको अभावमा काम गर्न समस्या भईरहेको जिल्ला जनस्वास्थ्य कार्यालयका प्रमुख शशीकान्त सिंहले जानकारी दिए ।