नेपाल साफ सेमिफाइनलमा

नवीन तिमल्सिना
१५ पुस, भारत (सिलिगुडी) । भारतको सिलिगुडीमा जारी दक्षिण एसियाली महिला फुटबल (साफ) प्रतियोगितामा नेपालले सेमिफाइनलयात्रा तय गरेको छ । समूह ए को विजेता बन्दै नेपालले चौथो साफको अन्तिम चारमा स्थान सुरक्षित गरेको हो । 
कञ्चनजंघा स्टेडियममा शुक्रबार भएको समूह चरणको अन्तिम खेलमा आत्मघाती गोलको मद्दतमा नेपालले श्रीलंकालाई १–० गोलले पराजित गरेको हो । नेपालको लागि वैकल्पिक खेलाडीको रुपमा ५५ औं मिनेटमा मैदान प्रवेश गरेकी सपना लामाले निर्णायक गोल गरिन् । खेलको ८६ औं मिनेटमा सपनाको कर्नर प्रहार श्रीलंकाली रक्षक आरडिएल गुनावारडानाको खुट्टामा लाग्दै बलले जाली चुमेको थियो ।  
नेपालले श्रीलंकाको गोलपोष्टमा दर्जनौं प्रहार गरेको थियो । श्रीलंकाको बलियो डिफेन्स तोड्न मुस्किल परेको नेपालले केही उत्कृष्ट प्रहार चुकायो । खेलको ७ औं मिनेटमा मञ्जलीकुमारी योञ्जनले डिबक्स नजिकबाट प्रहार गरेको शक्तिशाली प्रहार क्रस बार नजिकैबाट आकाशियो । 
दीपा राईले निकालेको उत्कृष्ट पासलाई खेलको १३ औं मिनेटमा शर्मिला थापाले डिबक्सभित्रबाट प्रहार गरेको बल आकाशिँदा गोल गर्ने सुनौलो अबसर नेपालले गुमाएको थियो । ४० औं मिनेटमा सावित्रा भण्डारीको फ्रिकिक प्रहारलाई श्रीलंकाली गोलरक्षकले सहजै समातिन् । 
सन २०१४ भएको तेस्रो साफमा नेपालले श्रीलंकालाई ३—० ले पराजित गरेको थियो । यसअघि नेपालले भुटानलाई ८–० र माल्दिभ्सलाई ९–० गोल अन्तलरे पराजित गरेको थियो । नेपालले समूह बि को उपविजेतासँग सोमबार फाइनल यात्राको लागि भिड्नेछ । उक्त समूहको विजेता र उपवजेता शनिवार हुने भारत र बंगलादेशको खेलले टुंगो लगाउनेछ । 
समूह ए मा नेपालसहित माल्दिभ्स, श्रीलंका र भुटान छन् । समूह बि मा भारत, अफगानिस्तान र बंगालादेश छन् । भारत ३ पटक च्याम्पियन बनेको छ । नेपाल ३ पटक नै उपविजेतामा चित्त बुझाएको छ । 
नेपालका प्रशिक्षक कुमार थापाले नेपाली खेलाडीले राम्रो खेलेर पनि श्रीलंकाली टिमको रक्षात्मक खेलका कारण स्कोर बनाउन नसकिएको बताए ।