राज्यमन्त्री बानियाँद्वारा महायज्ञमा १ लाख ११ हजार दान

२५ पुस, हेटौँडा । हेटौँडा–२५ दोभानचौरमा सोमबारदेखि शुरु भएको श्रीमद् भागवत सप्ताह धान्याञ्चल ज्ञान महायज्ञमा संस्कृति पर्यटन तथा नागरिक उड्डयन राज्यमन्त्री ईन्द्रबहादुर बानियाँले १ लाख ११ हजार १ सय ११ रुपैँया दान गरेका छन् । कमला आधारभुत प्राविको भौतिक सुधारका लागि आयोजना गरिएको महायज्ञको उद्घाटन गर्दै बानियाँले सहयोग गरेका हुन् ।

कार्यक्रममा बोल्दै राज्यमन्त्री बानियाँले आध्यामिक चिन्तन विना मानवताको विकास नहुने हुँदा यसतर्फ लाग्न सबैलाई आग्रह गरे । उनले सबै धर्मले राम्रो बाटो देखाउने हुँदा सबै धर्मप्रति उत्तिकै सदभाव राख्न सुझाव दिंदै संविधानमा पनि धर्म निरपेक्षताको व्यवस्था गरिएको बताए । सातै प्रदेशमा पर्यटकिय स्थल बनाउने आप्mनो योजना रहेको सुनाउँदै राज्यमन्त्री बानियाँले मुक्तिनाथ, स्वर्गद्वारी, पाथिभारा, लुम्बिनी, जनकपुरधाम लगायतका क्षेत्रको विकासमा पाँच बर्षे गुरुयोजनासहित काम गर्ने बताए ।

मूल समारोह समितिका संयोजक तोयनाथ तिमल्सिनाको अध्यक्षतामा भएको उद्घाटन कार्यक्रममा नेपाली काँग्रेस जिल्ला समिति सदस्य रामबाबु बानियाँ, राजदेवी माविका प्रधानाध्यापक सानुकाजी पाण्डे, विद्यालयका प्रधानाध्यापक कुमार अधिकारी, हंसलोक जनकल्याण समितिका अध्यक्ष भोला थापा, संचारकर्मी सविन न्यौपाने, विद्यालयका पूर्व प्रधानाध्यापक राजेश्वर देवकोटा लगायतले मन्तव्य व्यक्त गरेका थिए ।

महायज्ञ उद्घाटन अघि महायज्ञस्थलबाट शुरु भएको कलश यात्रा हटिया, हर्नामाडि लगायतका क्षेत्र परिक्रमा गरी कार्यक्रमस्थलमा समापन भएको थियो । माघ ३ गतेसम्म संचालन हुने महायज्ञमा युवापण्डित सुदर्शन चालिसेले कथावाचन गर्ने जनाईएको छ ।