अरुलाई दोष लगाएर पन्छने छुट छैन : मूख्यमन्त्री पौडेल

३ असोज, हेटौँडा । चौथो संविधान दिवस ३ नम्बर प्रदेशको राजधानी हेटौँडामा पनि मनाईएको छ । दिवसको अवसरमा शुक्रबार हेटौँडामा प्रभातफेरीको आयोजना गरिएको छ ।
संविधान दिवस मूल समारोह समितिको आयोजनामा प्रभातफेरीको कार्यक्रम भएको थियो । भुटनदेवी स्कूल चौरबाट शुरु भएको प्रभातफेरी हेटौँडा बजारका विभिन्न भाग परिक्रमा गरी मकवानपुर बहुमुखी क्याम्पसमा पुगेर टुंगिएको थियो । दिवसको अवसरमा आयोजित कार्यक्रममा मूख्यमन्त्री डोरमणी पौडेलले अब देशको समृद्धिका लागि जुट्न युवाहरुलाई आव्हान गरेका थिए । 
अरुलाई दोष लगाएर पन्छने छुट नरहेको भन्दै उनले अब सबैको मेहनत राष्ट्र निर्माण, सुशासन र समृद्धिका लागि हुनुपर्ने बताए । संघीयता कार्यान्वयनका लागि प्रदेश सरकारले आवश्यक नीति नियम, पूर्वाधार र जनशक्ति व्यवस्थापनको काम पुरा गरेको बताउँदै मूख्यमन्त्री पौडेलले गतबर्षको अनुभवको आधारमा बजेट कार्यान्वयन गरिने प्रतिवद्धता व्यक्त गरे । 
कार्यक्रममा ३ नम्बर प्रदेशका प्रदेश प्रमुख अनुराधा कोइराला, सभामुख सानुकुमार श्रेष्ठ, प्रमुख प्रतिपक्ष दलका नेता इन्द्रबहादुर बानियाँ, प्रतिनिधिसभा र प्रदेशसभाका सांसद, जनप्रतिनिधि, कर्मचारी, सुरक्षा निकाय, संघसंस्थाका प्रतिनिधि लगायतको सहभागिता रहेको थियो ।