सडक विस्तारबाट ४५ स्वास्थ्य संस्थाको सेवा प्रभावित

रुपेश दुलाल
६ माघ, हेटौँडा । डिभिजन सडक कार्यालय हेटौँडाले शुरु गरेको सडक विस्तार अभियानबाट हेटौँडाका चार दर्जन स्वास्थ्य संस्थाको सेवा प्रभावित हुने भएको छ । २५ मिटर क्षेत्रमा रहेका ४५ वटा स्वास्थ्य संस्थाको सेवा सडक विस्तारका कारण प्रभावित हुने भएको हो ।

हेटौँडाको एचआईडि, कर्रा, मेनरोड र राप्तिरोडमा रहेका मेडिकल हल, फार्मेसी, पोलिक्लिनिक, प्याथोलोजी र औषधी वितरक सडक विस्तार अभियानबाट प्रभावित हुन छन् । हेटौँडामा सबैभन्दा बढि राप्तिरोडमा २४ स्वास्थ्य संस्था रहेका छन् । हेटौँडा अस्पताल परिसरमा रहेका चार र सडकमा रहेका आधा दर्जन मेडिकल रहेका संरचना सडक कार्यालयले भत्काईसकेको छ ।

सडक विस्तारका क्रममा राप्तिरोडमा रहेका यति ड्रग हाउस, हिमालयन डेन्टल, किसन फर्मा, रामजानकी मेडिकल हल, भुटनदेवी मेडिकल, युनियन ड्रग हाउस, मनकामना फार्मेसी, शुभकामना डिष्ट्रिव्युटर, भडारी मेडिकल, सफल फार्मेसी, गुराँस मेडिकल, त्रिवेणी मेडिकल, दोलखा मेडिकल, गगन मेडिकल, गौतम फार्मेसी, स्नेहा फार्मेसी, संगम मेडिकल, अनु सर्जिकल, कान्तिपुर मेडिकल, प्राइम मेडिकल, साझा मेडिकल, चौतारी मेडिकल, इमर्जेन्सी मेकिडल, श्रेष्ठ फार्मेसी विस्थापित हुने जनाईएको छ ।

विस्थापित हुने मध्ये यति ड्रग, शुभकामना र त्रिवेणीले वितरकको पनि काम गर्ने भएकाले जिल्लाका ग्रामिण भेगसम्म पुग्ने औषधीको वितरणमा समेत प्रभाव पर्ने छ ।

त्यसैगरी, मेनरोडमा रहेका तमु फार्मेसी, लाईफो फर्मा, त्रिशक्ति फार्मेसी, शंकर फर्मेसी, निभव मेडिकल, सुस्वास्थ्य डेन्टल, कर्रामा रहेका गढीमाई मेडिकल, युनिक भडारी मेडिकल, चुरियामाई मेडिकल र एचआईडीमा रहेका पुष्पज्योति मेडिकल पनि २५ टिर सडक विस्तारका क्रममा विस्थापित हुने मेडिकल ल्याव एशोसियसन (मेलान) मकवानपुरका अध्यक्ष उत्सव चौलागाईंले बताए ।
सडक विस्तारका क्रममा ११ वटा ल्यावको सेवा प्रभावित हुने चौलागाईको भनाई छ । हेडम्बा प्याथोलोजि, संगम, दोलखा, निभव, रेडक्रस, हेटौँडा, चौधरी, एनएस, सफल, युनियन प्याथोलोजी र बीरगंज डाईग्नोसिस सेन्टर सडक विस्तारका क्रममा विस्थापित हुने भएका भएका छन् ।
व्यवस्थापनमा जोड
सडक विस्तारका क्रममा स्वास्थ्य संस्था र वितरकको सेवा प्रभावित हुँदा जिल्लामा औषधीको उपलव्धता र सेवामा असर पर्ने स्वास्थ्य सम्बन्धी संघसंस्थाको भनाई छ । सडक विस्तारका क्रममा एकैपटक धेरै स्वास्थ्य संस्था विस्थापित हुँदा भाडामा घर पाउन समस्या रहेको उनीहरुको भनाई छ ।

‘विस्थापित भएका स्वास्थ्य संस्थाहरुलाई एकिकृत रुपमा राख्ने व्यवस्था मिलाउनु जरुरी छ ।’–चौलागाईले भने–‘यसका लागि निश्चित स्थानमा मेडिकल जोन स्थापना गर्न सके सेवामा प्रभावकारिता, गुणस्तरियता र एकरुपता आउने छ ।’ यसबाट स्वास्थ्यकर्मीलाई सेवा दिन सहज र विरामी गठिनबाट समेत जोगिने उनको दावि छ ।
स्वास्थ्य संस्था एकै स्थानमा हुँदा अनुगमनका लागि पनि सहज हुनेछ । स्वास्थ्य सेवा जस्तो गम्भिर क्षेत्रको व्यवस्थापनका लागि सरोकारवाला पक्ष र  स्थानीय प्रशासनले छलफल गरी अघि बढ्नु जरुरी देखिन्छ ।