दिव्यताराको २१ औं साधारणसभा

२९ मंसिर, हेटौंडा । नेपाली कांग्रेस प्रदेश ३ संसदीय दलका नेता इन्द्रबहादुर बानियाँले बचत गर्ने बानीको विकाससँगै ऋण लिएर उत्पादनमुलक कार्य गर्न सुझाव दिएका छन् । 
शनिबार दिव्यतारा बहुउद्देश्यीय सहकारी संस्था लिमिटेडको २१ औं बार्षिक साधारणसभाको प्रमुख अतिथि रहेका उनले सहकारीबाट लिएको ऋण सही काममा प्रयोग गर्न सुझाव दिएका हुन् ।बैंकहरु पुग्न नसकेको ग्रामीण क्षेत्रहरुमा सहकारीले सर्वसाधरणको आयस्तर बृद्धिमा सहयोग गरिरहेको उल्लेख गर्दै नेता बानियँले सर्वसाधारणको सुखदुःखको साथीको रुपमा रहेको सहकारीले उत्पादनमुलक कार्यलाई प्राथमिकता दिनुपर्नेमा जोड दिए ।
उनले छरिएर रहेको पूँजीलाई एकत्रित गर्दै सहकारीले समाजको विकासमा समेत टेवा पु¥याइरहेको बताए । दिव्यतारा सहकारीले सदस्यहरुको विश्वास जित्दै अघि बढेको भन्दै उनले उत्पादनमुलक कार्यमा लगानी गर्न सुझाव दिए । 
सहकारीकी अध्यक्ष महालक्ष्मि उपाध्याय डिनाको सभाध्यक्षतामा भएको कार्यक्रममा राष्ट्रिय सहकारी बैंकका रामेश्वर अर्याल, मकवानपुर उद्योग वाणिज्य संघका बरिष्ठ उपाध्यक्ष माधव न्यौपाने, बहुउद्देश्यीय सहकारी संघका अध्यक्ष रामहरि न्यौपाने, सर्वोत्तम बचत तथा ऋण सहकारी संस्थाका अध्यक्ष रामबहादुर बस्नेत, सहकारीका सदस्य एवम् रेडियो मकवानपुर सञ्चालक समिति अध्यक्ष आनन्दराम पराजुली, सहकारी अन्तर्गतको उद्यमशील महिला समूहको तर्फबाट लक्ष्मी श्रेष्ठ, लेखा समिति संयोजक प्रकाश खतिवडा, सदस्य सेवा कार्यालय सानान्टार प्रमुख राजु घलेलगायतले मन्तव्य व्यक्त गरेका थिए ।
साधारणसभाको अवसरमा शेयर सदस्यका छोराछोरी मध्ये एसईईमा उत्कृष्ट अंक ल्याएर पास भएका ७ जनालाई सम्मान गरिएको थियो । 
सम्मानित हुनेमा दिविसा सापकोटा, विशेष दुलाल, प्रवेश गुरागाइँ, दिव्या गैरे, विनम्र अधिकारी, सोनिका रिजाल र निश्चल कोइराला रहेका छन् । 
यस्तै सहरकारीले ज्येष्ठ नागरिकतर्फ बसामाडी ३ का टंकबहादुर पण्डितलाई सम्मान गरिएको थियो । यसैगरी उत्कृष्ट बचतकर्ताको रुपमा हेटौंडा–१ का सन्दिप निर्मल, हेटौंडा–१० का अमृतकुमार लामा र कविर श्रेष्ठलाई सम्मान गरिएको थियो भने उत्कृष्ट ऋणीतर्फ हेटौंडा–८ का राजेशबहादुर कार्कीलाई सम्मान गरिएको थियो ।