यी हुन सिएनएन हिरो २०१९

१० पुस, हेटौँडा । सिएनएन हिरो २०१९ को उपाधी इथियोपियाकी फ्रेवानी मेब्राथुले हात पारेकी छिन् । टप टेनमा परेकामध्ये ९ जनालाई पछि पार्दै उनले उपाधी हात पारेकी हुन् । 

महिनाबारी हुँदा प्रयोग गर्ने सेनेटरी प्याडको पहुँचमा नरहेका इथियोपियाका युवतिहरुका लागि पुर्नप्रयोग गर्न मिल्ने खालको प्याड निर्माण गरेर सहजता प्रदान गरेको भन्दै उनले यो उपाधी दिईएको जनाईएको छ । सिएनएनका पत्रकार एनडर्सन कुपर र अमेरिकी कलाकार केली रिपाले सिएनएन हिरो २०१९ को उपाधी उनलाई हस्तान्तरण गरेका थिए । त्यस लगतै कार्यक्रममा सहभागीहरुले उठेर उनको तालीले प्रशंसा गरेका थिए ।

भावुक मुद्रामा प्रस्तुत भएकी मेब्राथुले आफु के भन्ने अन्यौलमा रहेको भन्दै कृतज्ञता व्यक्त गरिन् । उनले आफुले यो उपाधीलाई सबै महिला र युवतिहरुको सम्मानको रुपमा लिएको बताईन् । अहिलेसम्म महिनावारीबारे भन्न नसकेका सबै युवतिहरुका लागि सम्मानको विषय भएको उनको भनाई थियो ।

सामाजिक क्षेत्रमा सकारात्मक काम गरेका विश्वभरका संस्था र व्यक्तिमध्ये उत्कृष्ट एकलाई सिएनएनले ‘सिएनएन हिरो’ को उपाधी प्रदान गर्दै आएको छ । नेपालबाट अनुराधा कोइरालाले सन् २०१० र पुष्पा बस्नेतले सन् २०१२ मा सिएनएन हिरो तथा २०१६ मा सिएनएन सुपर हिरोको उपाधी हात पारेका थिए ।
(सिएनएनको सहयोगमा)