मकवानपुर उद्योग बाणिज्य संघका सदस्यलाई चुरेहिलमा छुट

११ पुस, हेटौंडा । मकवानपुर उद्योग वाणिज्य संघ र चुरेहिल अस्पताल प्रालिबिच छुट सुविधा प्रदान गर्ने सहमति भएको छ ।
हेटौंडा–११ मा रहेको चुरेहिल अस्पतालले उपचार गर्दा लाग्ने शुल्कहरुमा विभिन्न छुट प्रदान गर्ने सम्बन्धमा शुक्रबार सम्झौता भएको हो । सम्झौता अनुसार, अस्पतालले संघका सबै सदस्यहरुलाई ओपिडी बाहेकको उपचार सेवामा छुट प्रदान गर्ने छ । जसमा ल्याबारेटरी शुल्कहरुमा १५ प्रतिशत, औषधी शुल्कमा ७ प्रतिशत र अन्य सेवा शुल्कहरुमा १५ प्रतिशत छुट दिने भएको संघका बरिष्ठ उपाध्यक्ष माधव न्यौपानेले जानकारी दिए ।
सेवा लिन आउने सदस्यहरुले संघका नविकृत सदस्य भएको कार्ड बोकेर जानु पर्ने सम्झौता–पत्रमा उल्लेख गरिएको छ । त्यस्तै संघका नविकृत सदस्यहरुको एकाघरमा आश्रित परिवारलाई पनि यो सुविधा प्रदान गरिनेछ । त्यसका लागि नाता प्रमाणित हुने कागजात अनिवार्य पेश गर्नुपर्ने सम्झौता पत्रमा उल्लेख छ । नेपाल सरकारको बीमा कार्यक्रममा सहभागी भएका सदस्यहरुको हकमा भने यो सुविधा लागु नहुने उल्लेख छ । सम्झौता पत्र तीन वर्षमा नविकरण हुनेछ । 
कार्यक्रममा संघका वरिष्ठ उपाध्यक्ष माधव न्यौपाने, महासचिव प्रमोद सिंह रानाभाट र अस्पतालका अध्यक्ष गोकर्ण पराजुली, प्रशासन प्रमुख विवेक मानन्धर, व्यवस्थापक सुरेन्द्र बडु लगायतको उपस्थिति रहेको थियो ।