श्रमिक दुग्ध सहकारीको भेला सम्पन्न

२० पुस, हेटौँडा । मकवानपुरगढी–२ शिखरकटेरीमा रहेको श्रमिक दुग्ध उत्पादक सहकारी संस्थाको २६ औं वार्षिक साधारणसभा आईतवार सम्पन्न भएको छ । 
साधारणसभामा संस्थाका अध्यक्ष हरिकुमार हुमागाईले संस्थागत प्रतिवेदन, व्यवस्थापक हरिप्रसाद न्यौपानेले लेखासमितिको प्रतिवेदन र लेखासमितिका सदस्य राजकुमार गोलेले लेखा समितिको प्रतिवेदन प्रस्तुत गरेका थिए । 
साधारणसभामा ज्येष्ठ शेयर सदस्य सीताराम चौरेल, होमनाथ चौरेल, टिकाराम स्याङतान, गैगादेवी भट्ट, दामोदर पनेरु र सुपत सिह स्याङतानलाई दोसल्ला ओढाएर सम्मान गरिएको थियो । कार्यक्रममा गुणस्तरीय दूध विक्री गर्ने पूर्णमाया गोले र शान्ति योन्जन सरसफाईमा तेजनाथ देवकोटा, विरबहादुर गोले र कृष्णबहादुर रुम्वालाई पुरस्कृत गरिएको थियो । मकवानपुरगढी गाउँपालिकाकी उपाध्यक्ष हर्कमाया रुम्वाको प्रमुख आतिथ्यता र संस्थाका अध्यक्ष हरिकुमार हुमागाईको अध्यक्षतामा भेला भएको थियो ।
भेलामा मकवानपुरगढी–२ का अध्यक्ष बखानसिह पाख्रिन, मकवानपुर जिल्ला दुग्ध उत्पादक सहकारी सघका अध्यक्ष बासुदेव अधिकारी, संस्थाका पूर्वअध्यक्ष अर्जुनप्रसाद चौरेल, चुच्चेखोला सामुदायिक वनका अध्यक्ष अर्जुनप्रसाद दाहाल, चन्द्र सूर्य सहकारीका अध्यक्ष गोपाल प्रसाद गौतम, संस्थाका लेखा समितिका संयोजक गंगाराज गोले, संचारकर्मी भीमसेन पौडेल, अर्जुनप्रसाद गौतम, यदुकुमार घिमिरे लगायतले मन्तव्य व्यक्त गरेका थिए । 
संस्थाले आव ०७५/०७६ मा ४ लाख २० हजार लिटर दूध विक्री गरी २ करोड ९ लाख आम्दानी गर्न सफल भएको संस्थाले जनाएको छ । संस्थामा २ सय २ जना शेयर सदस्यहरु आवद्ध रहेका छन् ।