'जनताको अवस्था फेर्ने अभियानमा माओवादी'

२१ फागुन, हेटौँडा । नेकपा माओवादी केन्द्र पोलिट्व्यूरो सदस्य तथा मकवानपुर जिल्ला संयोजक प्रेमबहादुर पुलामी ‘छिन्तु’ले  जनताको अवस्था फेर्ने अभियानमा लागिपरेको बताए । 
‘हाम्रो आन्दोलनको कारण प्रजाबाट नागरिक’ भएको बताउँदै पुलामीले  यदि आन्दोलन र संघर्ष नभएको भए हामी प्रजा नै भइरहने तर्क प्रस्तुत गरेका थिए । शनिबार नेकपा माओवादी केन्द्र हेटौंडा–१८ चुरियामाईको वडा भेला सम्मेलनमा प्रमुख अतिथि रहेको पुलामीले यस्तो बताएका हुन् । सम्मेलनले लालबहादुर घलानको अध्यक्षतामा २१ सदस्यीय नयाँ कमिटी गठन भएको छ । 
उपाध्यक्षमा गिता प्रसाद दुलाल, सचिवमा भीम पाख्रिन, सहसचिवमा आलोक स्याङतान, कोषाध्यक्षमा उषा घलान चयन भएको पार्टी प्रचारविभाग प्रमुख कमान सिं पाख्रिन ‘पृथक’ ले जानकारी दिए । त्यसैगरी वाइसिएल विजय नेगीको संयोजक रहने गरी ३३ सदस्यीय कमिटी चयन भएको छ । 
शनिबार भएको भेलाबाट कमला थिङ संयोजक रहने १३ सदस्यीय महिला क्रान्तिकारी वडा आयोजक कमिटी गठन भएको पृथकले जानकारी दिए । कार्यक्रममा पार्टी केन्द्रीय आयोजक समिति सदस्य ललित घलान, विवेक राइ, प्रविण विक, मानबहादुर लामा, डा. सम्राट तुम्वाहाम्फे, लिलाकुमार घलान, मनकुमार लो लगायतको सहभागिता रहेको थियो ।