हेटौँडामा एमालेको सभा शुरु हुँदै, सुरक्षा कडा (हेर्नुस् तस्विरहरु)

२७ फागुन, हेटौँडा । तीन दिनका लागि स्थगित गरेको नेकपा एमालेले शुक्रबार हेटौँडाबाट मेचिमहाकाली अभियान शुरु गर्दैछ । दिउसो २ बजे हेटौँडाको भुटनदेवी स्कूल चौरमा हुने अभियानको सभाका लागि सुरक्षा कडा पारिएको छ ।

कार्यक्रमस्थल वरीपरी नेपाल प्रहरी र सशस्त्र प्रहरीको बाक्लो उपस्थिति रहेको छ । कार्यक्रमस्थल प्रवेशद्वारमा नेपाल प्रहरीले जाँच गर्दै कार्यकर्तालाई प्रवेश गराईरहेको छ । सप्तरीमा भएको झडप पछि हेटौँडाबाट पुनः शुरु हुन लागेको अभियानलाई सुरक्षाका दृष्टिकोणले संवेदनशिल मानिएको छ । कार्यक्रममा सहभागी हुन गाउँ/गाउँमा एमाले कार्यकर्ताहरु समूह बनाएर तयारी गरिरहेका छन् । विभिन्न भागबाट मोटरसाइकल र्यालीसहित कार्यकर्ता आउने तयारी भईरहेको छ । दिउसो हुने सभालाई एमाले अध्यक्ष केपि शर्मा ओली, बरिष्ठ नेता माधवकुमार नेपाल, झलनाथ खनाल लगायतले सम्बोधन गर्ने छन् ।

सप्तरी घटनापछि हुन लागेको सभामा नेताहरुले के बोल्छन् भन्नेमा धेरैको ध्यान केन्द्रित रहेको छ । सभामा करिव २० हजार जनाको सहभागिता रहने अपेक्षा गरिएको छ । सभामा बढि भन्दा बढि उपस्थितिका लागि केही दिन अघिदेखि नै एमालेले सबै क्षेत्रमा घरदैलो गरी प्रचारप्रसार गरेको थियो ।