नगरस्तरीय भलिवको उपाधि वडा नम्बर १२ र वडा नम्बर १९ लाई

१८ फागुन, हेटौंडा । हेटौंडामा सम्पन्न नगरस्तरीय महिला तथा पुरुष भलिबल प्रतियोगितामा पुरुषतर्फको उपाधी वडा नम्बर १२ र महिलातर्फको उपाधि वडा नम्बर १९ ले जितेको छ । 
केशवलाल श्रेष्ठ स्मृति केन्द्रीय प्रतिष्ठानको आयोजनामा भएको प्रतियोगितामा पुरुषतर्फको उपाधि जित्ने क्रममा वडा नम्बर १२ ले ५ नम्बर वडालाई १५–२५, २५–१७, २५–१५, १८–२५ र १६–१४ को सेटमा हराएको हो । 
उपाधिसँगै १२ नम्बर वडाले नगद पचासहजार सहित नगरकपको शिल्ड, मेडल र प्रमाणपत्र प्राप्त गरेको छ । यस्तै उपबिजेता बनेको ५ नम्बर वडाले नगद तीसहजार, शिल्ड र मेडल प्राप्त गरेको छ ।
यसैगरी शनिवार नै सम्पनन भएको महिलातर्फको फाइनल खेलमा वडा नम्बर १४ लाई हराउँदै १९ नम्बर वडाले उपाधी जितेको हो । 
खेलमा वडा नम्बर १९ ले २५–१९, २५–१५ र २५–१७ को सोझो सेटमा उपाधि जितेको हो । उपाधिसंगै १९ नम्बर वडाले पनि नगद पचासहजार सहित शिल्ड, मेडल र प्रमाणपत्र प्राप्त गरेको छ ।
यस्तै उपबिजेता बनेको वडा नम्बर १४ ले नगद तीसहजार सहित शिल्ड मेडल र प्रमाणपत्र प्राप्त गरेको छ ।
प्रतियोगितामा पुरुषतर्फ हेटौंडा–१२ का बुद्धिकृष्ण दंगाल सर्वोत्कृष्ट खेलाडी घोषित भए । यस्ते हेटौंडा–१२ का सुमन स्याङ्तान उत्कृष्ट सेटर, हेटौंडा–११ का निरन सपकोटा उत्कृष्ट डिफेन्डर, हेटौंडा–५ का प्रकाश चौलागाईं उत्कृष्ट स्पाइकर र निरपेश जोशी उत्कृष्ट ब्लकर घोषित भए । 
यस्तै महिलातर्फ हेटौंडा–१९ की सपना बस्नेत उत्कृष्ट खेलाडी घोषित हुँदा हेटौंडा–१४ का सरस्वती खड्का र सञ्चमाया थिङ उदीयमान खेलाडी, हेटौंडा–१९ की सुजिता थापा उत्कृष्ट सेटर र हेटौंडा–९ की आयुषा सिंह उत्कृष्ट डिफेन्डर घोषित भइन ।
विजयी टिम तथा उत्कृष्ठ हुन सफल खेलाडीहरुलाई हेटौंडा उपमहानगरपालिकाका उपमेयर मीना लामाले पुरस्कार वितरण गरेकी थिइन् । 
आयोजक प्रतिष्ठानका अध्यक्ष प्रताप विष्टको अध्यक्षतामा भएको कार्यक्रममा हेटौंडा–५ निवासी पूर्व राष्ट्रिय खेलाडी चुडाकुमारी खड्का, पूर्व राष्ट्रिय रेफ्री दीपकरुद्र कर्माचार्य र खेलकुदलाई सहयोग गर्दै आएका हेटौंडा स्कूल अफ म्यानेजमेण्टका संयोजक पुरनबहादुर जोशीलाई सम्मान गरिएको थियो ।