रेन्जपोष्ट महासंघले क्षमता अभिवृद्धि तालिम गर्ने

भीमसेन पौडेल
६ चैत, हेटौडा । हेटौँडा रेन्जपोष्ट महासंघको नियमित बैठक आईतवार सम्पन्न भएको छ । हेटौडा–१५ मा रहेको संसारेमाई सामुदायिक वन उपभोक्ता समूहको सभाहलमा बैठक सम्पन्न भएको हो । 
बैठकमा विभिन्न सामुदायिक वन समूहले गरेका कामहरु, आईपरेका समस्या र समाधान, अनुभव आदानप्रदान, महासंघको नाममा बैंकमा खाता सञ्चालन गर्ने लगायतका विषयहरुमा छलफल गरिएको थियो । बैठकले महासंघमा आवद्ध पदाधिकारीहरुको क्षमता अभिवृद्धि गर्न चैत्र २३ गते हेटौडामा एक दिने तालिम सञ्चालन गर्ने निर्णय समेत गरेको महासंघकी महासचिव आरती पाठकले जानकारी दिईन् । 
महासंघले यस अघि देशका विभिन्न जिल्लामा रहेका सामुदायिक वन समूहले गरेका गतिविधीहरुको बारेमा जानकारी लिन ४ दिने अवलोकन भ्रमण गरिसकेको छ । बैठकमा संसारेमाई सामुदायिक वनका अध्यक्ष गणेशबहादुर मोक्तान, सुन्दर सामुदायिक वनका अध्यक्ष कमल लामा, न्यूरेनी चिसापानी सामुदायिक वनका अध्यक्ष ज्ञान बहादुर क्षेत्री, रानी सामुदायिक वनका कार्यालय सचिव भीमसेन पौडेल लगायतले आगामी दिनमा महासंघले गर्नु पर्ने कार्यहरुको बारेमा जानकारी गराएका थिए ।
बैठक सामुदायिक वन उपभोक्ता महासंघ मकवानपुरकी अध्यक्ष पञ्चमाया स्याङतानको प्रमुख आतिथ्यता एवम् रेन्जपोष्ट महासंघका अध्यक्ष लक्ष्मणप्रसाद भण्डारीको अध्यक्षतामा भएको थियो । बैठकमा हेटौँडा रेन्जपोष्टमा आवद्ध सामुदायिक वनका अध्यक्ष एवम प्रतिनिधीहरुको सहभागिता रहेको थियो ।