अब विकासको काम अघि बढ्छ : मूख्यमन्त्री पौडेल

File Photo

५ चैत, हेटौंडा । बागमती प्रदेशका मूख्यमन्त्री डोरमणी पौडेलले अब विकासको काम अघि बढ्ने दावि गरेका छन् । 
विशेष र शुन्य समयमा उठेका प्रश्नहरुको बुधबार प्रदेशसभा बैठकमा जवाफ दिंदै मूख्यमन्त्री पौडेलले यसअघि डिपिआर गर्ने कामका कारण विकासको काममा केही ढिलाई भएको भन्दै डिपिआरको काम सकिएकाले विभिन्न योजनाहरुको अब टेण्डर प्रक्रिया अघि बढाउने प्रतिवद्धता व्यक्त गरेका हुन् । उनले हेटौंडा–काठमाडौं जोड्ने सडक स्तरोन्नति गर्ने काम अघि बढाउने बताउँदै उनले फाखेल सडक खण्ड स्तरीकरण भईरहेको बताए । 
उनले सुरुङमार्गको डिपिआरको काम भईरहेको र यसै आर्थिक बर्षमा टेण्डर हुने विश्वास दिलाए । प्रदेशसभा भवनको पनि टेण्डरको तयारी भएको उनको भनाई छ ।
प्रदेशमा कोरोनाविरुद्ध तयारी छ 
उनले प्रदेशमा कोरोना संक्रमणविरुद्ध लड्न प्रदेश सरकार तयारी अवस्थामा रहेको बताए । उनले विभिन्न स्थानमा हेल्थ डेक्स स्थापना गरिएको र जनशक्ति समेत तयारी अवस्थामा रहेको बताए । प्रदेशभरीका अस्पताललाई तयारी अवस्थामा रहन निर्देशन दिएको उनको भनाई छ । सशस्त्र प्रहरी बलसंगको समन्वयमा ४० शैय्याको आईसोलेसन सेन्टर बनाउने तयारीमा सरकार रहेको उनको भनाई छ ।