प्रदेश सांसदहरुले सोधे समितिको औचित्य के ?

File Photo

६ चेत, हेटौंडा । बागमती प्रदेशका सांसदहरुले संसदीय समितिको औचित्यबारे प्रश्न गरेका छन् । प्रदेश युवा परिषद गठन सम्बन्धमा व्यवस्था गर्न बनेको विधेयकमाथि विहिबार संसदमा छलफल गर्दै उनीहरुले  यस्तो प्रश्न गरेका हुन् । 
संसदीय समितिमा भएको छलफल र सहमति अनुसार प्रतिवेदन तयार नभएको भन्दै उनीहरुले समितिमा छलफल गर्नुको औचित्य नहुने बताए । बैठकमा बोल्दै प्रदेशसभा सदस्य विभाजभक्त श्रेष्ठले विधेयकले युवाहरुको अधिकारमाथि बढि जोड दिएको भन्दै कर्तव्यसम्बन्धी विषयहरु प्रस्तावनामा राख्नुपर्नेमा जोड दिएका थिए । प्रस्तावना परिमार्जन गर्नै हुन्न भन्ने सोच त्याग्नुपर्ने उनको सुझाव थियो । सांसद रमेश पौडेलले समितिको बैठकमा सामाजिक विकास मन्त्री युवराज दुलालले समेत संशोधन गर्ने प्रतिवद्धता गरेको सम्पूर्ण समिति र संशोधनकर्ता साक्षी रहेको बताए । तर प्रतिवेदन प्रतिवद्धता अनुसार नआएको भन्दै समितिमा हुने छलफलको औचित्य नहुने बताए । 
सांसद नरोत्तम बैद्यले पनि संशोधन हुन्छ भन्ने तर संशोधन नगर्ने कामले समितिको अपमान हुने बताए । छलफलमा सांसद माधव पौडेल, रिना गुरुङ, सरेश नेपाल लगायतले विधेयकमाथि धारणा राखेका थिए । यसअघि, संसदले सामाजिक विकास मन्त्री युवराज दुलालले पेश गरेको शिक्षा, स्वास्थ्य तथा कृषि समितिको प्रतिवेदनसहितको विधेयक पारित गर्न संसदमा पेश गरेका थिए । बैठकले विधेयक सर्वसम्मत पारित गरेको छ । बैठकमा प्रदेश मामिला समितिका सभापति माधव पौडेलले स्थानीय तहको सेवा सुविधा सम्बन्धमा व्यवस्था गर्न वनेको विधेयक समितिको प्रतिवेदनसहित संसदमा पेश गरेका थिए ।