फिफा वरीयतामा नेपाल १७०औं स्थानमा 

२८ चैत्र, हेटौंडा । विश्व फुटबलको सर्वोच्च निकाय फिफाले विहीबार जारी गरेको पछिल्लो वरीयतामा नेपालको स्थान यथावत रहेको छ । 
फिफाले जारी गरेको वरीयतामा नेपाल यसअघिकै विश्व वरीयता १७० औँ स्थानमा यथावत रहेको हो । 
दक्षिण एसियामा नेपाल तेस्रो स्थानमा छ । भारत र माल्दिभ्स नेपालभन्दा अघि छन् भने बंगलादेश, भुटान पाकिस्तान र श्रीलंका नेपाल भन्दा पछि छन् । 
विश्व वरीयता अनुसार भारत १०८औं र माल्दिभ्स १५५औं स्थानमा यथावत छ । यस्तै बंगालदेश १८७औं, भुटान १८९औं, पाकिस्तान २००औं र श्रीलंका २०६औं स्थानमा छ ।
प्रत्येक एक एक महिनामा सार्वजनिक हुने गरेको फिफाको वरीयता यसपटक दुई महिनामा सर्वाजनिक भएको हो । यसअघि फिफाले फेब्रुअरीमा विश्व वरीयता सार्वजनिक गरेको थियो ।
यसपटकको विश्व वरीयतामा एक टिम बाहेक अरुसबैको वरीयता यथावत रहेको छ । बिहीबार सार्वजनिक वरीयतामा साउथ सुडान बर्मुडा भन्दा अगाडि पुगेको छ । तर दुवैको समा अंक रहेकोले बर्मुडा तल झरेको छैन । साउथ सुडान र बर्मुडा दुवै १६८औं स्थानमा संयुक्त रुपमा रहेका छन् । 
विश्व वरीयतामा भने युरोपियन राष्ट्र बेल्जियम शीर्ष स्थानमा यथावत छ । शीर्ष १० मा पनि कुनै फेरबदल छैन । 
वरीयता अनुसार फ्रान्स दोस्रो, ब्राजिल तेस्रो, इंग्ल्याण्ड चौथो र उरुग्वे पाँचौ स्थानमा यथावत छ । यस्तै क्रोएसिया छैटौँ, पोर्चुगल सातौं, स्पेन आठौं, अर्जे्न्टिना नवौं र कोलोम्बिया दशौं स्थानमा यथावत छन् ।