कोरोनाबाट अहिलेसम्म १ लाख १९ हजार बढीको ज्यान गयो 

२ बैशाख, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) को संक्रमणबाट मर्नेको संख्या १ लाख १९ हजार नाघेको छ ।
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमणका कारण मर्नेको संखया १ लाख १९ हजार ६१८ पुगेको छ । पछिल्लो २४ घण्टामा मात्रै कोरोनाबाट ५ हजार ४ सय २३ जनाको मृत्यु भएको छ ।
यस्तै अहिलेसम्म कोरोना संक्रमणबाट विश्वभर कुल १९ लाख २३ हजार ८४८ जना मासिन संक्रमित भएका छन् । पछिल्लो २४ घण्टामा मात्रै ७१ हजार ५९१ जना नयाँ कोरोना संक्रमित थपिएका छन् ।
संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार ४ लाख ४४ हजार ६३६ जना उपचारपछि निको भएका छन् ।
यस्तै भाइरसका संक्रमणका कारण अहिले ५१ हजार ७४७ जना गम्भीर अवस्थामा उपचार गराइरहेका छन् भने १३ लाख ८ हजार ५२ जनाको अवस्था मध्यम रहेको छ । 
कोरोनाको संक्रमणबाट पछिल्लो समय सबैभन्दा बढी मानिसको मृत्यु अमेरिकामा भएको छ । अमेरिकामा ज्यान गुमाउँनेको संख्या २३ हजार ६४० पुगेको छ । पहिलो २४ घण्टामा यहाँ थप १ हजार ५३५जनाको मृत्यु भएको छ । 
अमेरिकापछि अहिलेसम्म इटलीमा सबैभन्दा बढीको कोरोना संक्रमणबाट ज्यान गएको छ । यहाँ थप ५६६ जनाको मृत्यु भएपछि कुल २० हजार ४६५ जनाको मृत्यु भएको छ ।
इटालीमा पछिल्लो समय ३ हजार १५३ जना नयाँ संक्रमित थपिएका छन् । यो सँगै यहाँ कुल १ लाख ५९ हजार ५१६ जना कोरोना संक्रमित पुगेका छन् ।
यसैगरी कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या १७ हजार ७५६ पुगेको छ । स्पेनमा पछिल्लो २४ घण्टामा ५४७ जना थप मानिको मृत्यु भएको छ भने ३ हजार २६८ जना नयाँ संक्रमित थपिएका छन् ।
यसैगरी लगातार मृतक र नयाँ संक्रमित बढिरहेको फ्रान्समा पछिल्लो २४ घण्टामा ५७४ जनाले ज्यान गुमाएपछि यहाँ मर्नेको संख्या १४ हजार ९६७ पुगेको छ । यहाँ संक्रमितको संख्या १ लाख ३६ हजार ७७९ पुगेको छ । फ्रान्समा पछिल्लो २४ घण्टामा ४ हजार १८८ जना नयाँ संक्रमित थपिएका छन् । 
यसैगरी कोरोना भाइरसको संक्रमणबाट बेलायतमा ११ हजार ३२९ जनाको मृत्यु भइसकेको छ । यहाँ पनि पछिल्लो समयमा मृतकको संख्यामा बृद्धि भइरहेको छ । बेलायतमा एकैदिन थप ७१७ जनाको मृत्यु भएको छ । 
यसैगरी मध्यपूर्वी एसियाली मुलुक इरानमा ४ हजार ५८५, बेल्जियममा ३ हजार ९०३, जर्मनीमा ३ हजार १९४, नेदरल्याण्डसमा २ हजार ८२३, ब्राजिलमा १ हजार ३२८, टर्कीमा १ हजार २९६ र स्विटजरल्याण्डमा १ हजार १३८ जनाले ज्यान गुमाएका छन् ।
कोरोना भाइरसको उदगमस्थन चीनमा थोरै संख्यामा मात्रै संक्रमित ज्यान गुमाउनेको संख्या थोरैमात्र थपिएको छ । यहाँ अहिलेसम्म ३ हजार ३४१ जनाले ज्यान गुमाएका छन् । पछिल्लो समय चीनमा १०८ जना नयाँ संक्रमित थपिएका छन भने २ जनाको ज्यान गएको छ ।