दक्षिण एसियाः कोरोनाबाट मर्नेको संख्या भारतमा बढी

२ बैशाख, हेटौंडा । विश्वभर महामारीको रुपमा फैलिरहेको कोरोना भाइरस कोभिड–१९ ले दक्षिण एसियाका देशहरुमा पनि महामारीको रुप लिएको छ ।
कोरोना सम्बन्धि तत्थ्याङक प्रस्तुत गरिरहेको वेबसाइट वल्डोमिटरका अनुसार दक्षिण एसियाली देशहरुमा भारतमा सबैभन्दा बढी संक्रमित र मृतकको संख्या भारतमा रहेको छ । 
दक्षिण एसियामा कोरोनाको संक्रमणबाट सबैभन्दा बढी भारतमा ३ सय ५८ जनाको मृत्यु भएको छ । पछिल्लो समय थप २७ जनाको मृत्यु भएपछि भारतमा मर्नेको संख्या ३ सय ५८ पुगेको हो । 
यस्तै भारतमा संक्रमितको संख्या पनि दक्षिण एसियामा सबैभन्दा बढी छ । यहाँ कोरोना संक्रमितको संख्या १० हजार ४ सय ५३ पुगेको छ । पछल्लो २४ घण्टामा मात्रै यहाँ १ हजार २ सय ४८ जना नयाँ संक्रमित थपिएका छन् । यस्तै भारतमा १ हजार १ सय ८१ जना उपचारपछि स्वस्थ्य भएका छन् । 
भारतपछि दक्षिण एसियामा कोरोनाको संक्रमणबाट मर्नेको संख्या पाकिस्तानमा बढी छ । पाकिस्तानमा अहिलेसम्म ९३ जनाको ज्यान गएको छ । यहाँ २४ घण्टामा २ जनाको ज्यान गएको छ । यस्तै थप २ सय ६६ जना नयाँ संक्रमित थपिएसँगै पाकिस्तानमा संक्रमितको कुल संख्या ५ हजार ४ सय ९६ पुगेको छ । 
यस्तै बंगलादेशमा कोरोना संक्रमणबाट ३९ जनाको मृत्यु भएको छ भने ८ सय ३ जना संक्रमित भएका छन् । वितेको २४ घण्टामा यहाँ ५ जनाको ज्यान गएको छ भने १ सय ८२ जना नयाँ संक्रमित थपिएका छन् ।
यसैगरी अर्को दक्षिण एसियाली मुलुक श्रीलंकामा कोरोनाका कारण अहिलेसम्म ७ जनाले ज्यान गुमाएका छन् भने २ सय १७ जना संक्रमित छन् । यहाँ पछिल्लो समय ७ जना नयाा संक्रमित थपिएका छन् ।
दक्षिण एसियाली मुलुक माल्दिभ्स, नेपाल र भुटानमा कोरोना संक्रमितको संख्या केही दिन यता निरन्तर स्थिर अवस्थामा छ । यी तीन मुलकमा गरी अहिलेसम्म एकजनाको पनि मृत्यु भएको छैन । 
कोरोना संक्रमणबाट माल्दिभ्समा अहिले सम्म २० जना संक्रमित भइसकेका छन् । नेपालमा कोरोना संक्रमितको संख्या १४ पुगेको छ । पछिललो २४ घण्टामा नेपालमा २ जना नयाँ संक्रमित थपिएका छन् । नेपालमा एक जना उपचार पछि निको भएका छन् ।
यस्तै भुटानमा अहिलेसम्म ५ जनामा कोरोना संक्रमण भएको छ । यहाँ दुईजना उपचारपछि निको भएका छन भने तीन जनाको उपचार चलिरहेको छ ।