दक्षिण एसियाः कोरोनाबाट मर्नेको संख्या भारतमा बढी

५ बैशाख, हेटौंडा । विश्वभर महामारीको रुपमा फैलिरहेको कोरोना भाइरस कोभिड–१९ ले दक्षिण एसियाका देशहरुमा पनि महामारीको रुप लिएको छ ।
कोरोना सम्बन्धि तत्थ्याङक प्रस्तुत गरिरहेको वेबसाइट वल्डोमिटरका अनुसार दक्षिण एसियाली देशहरुमा सबैभन्दा बढी संक्रमित र मृतकको संख्या भारतमा रहेको छ । 
दक्षिण एसियामा कोरोनाको संक्रमणबाट सबैभन्दा बढी भारतमा ४ सय ४८ जनाको मृत्यु भएको छ । पछिल्लो समय थप २६ जनाको मृत्यु भएपछि भारतमा मर्नेको संख्या ४ सय ४८ पुगेको हो । 
यस्तै भारतमा संक्रमितको संख्या पनि दक्षिण एसियामा सबैभन्दा बढी छ । यहाँ कोरोना संक्रमितको संख्या १३ हजार ४ सय ३० पुगेको छ । पछल्लो २४ घण्टामा मात्रै यहाँ १ हजार ६० जना नयाँ संक्रमित थपिएका छन् । यस्तै भारतमा १ हजार ७ सय ६८ जना उपचारपछि स्वस्थ्य भएका छन् । 
भारतपछि दक्षिण एसियामा कोरोनाको संक्रमणबाट मर्नेको संख्या पाकिस्तानमा बढी छ । पाकिस्तानमा अहिलेसम्म १ सय २८ जनाको ज्यान गएको छ । यहाँ २४ घण्टामा थप १७ जनाको ज्यान गएको छ । यस्तै थप ५ सय ३६ जना नयाँ संक्रमित थपिएसँगै पाकिस्तानमा संक्रमितको कुल संख्या ६ हजार ९ सय १६ पुगेको छ । 
यस्तै बंगलादेशमा कोरोना संक्रमणबाट अहिलेसम्म ६० जनाको मृत्यु भएको छ भने १ हजार ५ सय ७२ जना संक्रमित भएका छन् । वितेको २४ घण्टामा यहाँ १० जनाको मृत्यु भएको छ भने ३ सय ४१ जना नयाँ संक्रमित थपिएका छन् ।
यसैगरी अर्को दक्षिण एसियाली मुलुक श्रीलंकामा केही दिन यता कोरोनाको संक्रमणबाट ज्यान गुमाउने र नयाँ संक्रमित बढ्ने क्रम रोकिएको छ । यहाँ अहिलेसम्म ७ जनाले ज्यान गुमाएका छन् भने २ सय ३८ जना संक्रमित छन् । 
दक्षिण एसियाली मुलुक माल्दिभ्समा कोरोना भाइरसको संक्रमणबाट कसैको पनि ज्यान गएको छैन भने संक्रमितको संख्या २५ मात्रै छ । यहाँ पछिल्लो २४ घण्टामा भने ३ जना नयाँ संक्रमित थपिएका छन् । 
यसैगरी नेपाल र भुटानमा कोरोना संक्रमितको संख्या केही दिन यता निरन्तर स्थिर अवस्थामा छ । यी दुई मुलकमा पनि अहिलेसम्म कसैको पनि कोरोनाको संक्रमणबाट मृत्यु भएको छैन । 
नेपालमा कोरोना संक्रमितको संख्या १६ पुगेको छ । नेपालमा एक जना उपचार पछि निको भएका छन् ।
यस्तै भुटानमा अहिलेसम्म ५ जनामा कोरोना संक्रमण पाइएकोमा दुईजना उपचारपछि निको भएका छन भने तीन जनाको उपचार चलिरहेको छ ।