कोरोना कहरः मृतक र संक्रमितको संख्या घट्दै

८ बैशाख, हेटौंडा । विश्वभर महारामारीको रुपमा फैलिरहेको कोरोना भाइरस (कोभिड–१९) बाट नयाँ संक्रमित हुने र मृतकको संख्या घट्न थालेको छ । 
कोरोना भाइरसको तत्थ्याङक सार्वजनिक गरिरहेको वेवसाइट वल्डोमिटरका अनुसार अहिलेसम्म कोरोना संक्रमणका कारण मर्नेको संखया १ लाख ६५ हजार ४९ पुगेको छ । 
पछिल्लो २४ घण्टामा संक्रमणबाट ४ हजार ९ सय ५७ जनाको मृत्यु भएको छ । यो संख्या विगत केही दिनमा दैनिक ज्यान जाने मानिसहरुको संख्या भन्दा कम हो । यसअघि दैनिक जसो ७ देखी ८ हजार सम्म मानिसहरुको संक्रमणबाट ज्यान जाने गरेको थियो ।
यस्तै अहिलेसम्म कोरोना संक्रमणबाट विश्वभर कुल २४ लाख ६ हजार २ सय ४२ जना मासिन संक्रमित भएका छन् । संक्रमित हुनेको संख्यापनि घटेको छ । पछिल्लो २४ घण्टामा ७५ हजार ४ सय ७१ नयाँ संक्रमित थपिएका छन् ।
संक्रमितहरु मध्ये ठूलो संख्यामा उपचारपछि निको पनि भएका छन् । पछिल्लो तथ्यांक अनुसार ६ लाख २४ हजार ९ सय ७४ जना उपचारपछि निको भएका छन् ।
यस्तै भाइरसका संक्रमणका कारण अहिले ५४ २ सय २२ जना गम्भीर अवस्थामा उपचार गराइरहेका छन् भने १५ लाख ६३ हजार ४९ जनाको अवस्था मध्यम रहेको छ । 
कोरोनाको संक्रमणबाट सबैभन्दा बढी मानिसको मृत्यु अमेरिकामा भएको छ । पछिल्लो २४ घण्टामा मात्रै अमेरिकामा १ हजार ५ सय ३४ को मृत्यु भएको छ । यो सँगै अमेरिकामा ज्यान गुमाउँनेको संख्या ४० हजार ५ सय ४८ पुगेको छ । 
अमेरिकापछि अहिलेसम्म इटलीमा सबैभन्दा बढीको कोरोना संक्रमणबाट ज्यान गएको छ । यहाँ २३ हजार ६ सय ६० जनाको मृत्यु भएको छ । पछिल्लो समय इटालीमा थप ४ सय ३३ जनाको मृत्यु भएको छ ।
यसैगरी कोरोनासंग जुधिरहेको अर्को यूरोपेली मुलुक स्पेनमा ज्यान गुमाउनेको संख्या २० हजार ४ सय ५३ पुगेको छ । स्पेनमा पछिल्लो २४ घण्टामा थप ४ सय १० जना मानिको मृत्यु भएको छ ।
यसैगरी फ्रान्समा पछिल्लो २४ घण्टामा ३ सय ९५ जनाले ज्यान गुमाएका छन् । यहाँ संक्रमणबाट मर्नेको संख्या १९ हजार ७ सय १८ पुगेको छ । 
यसैगरी कोरोना भाइरसको संक्रमणबाट बेलायतमा १६ हजार ६० जनाको मृत्यु भइसकेको छ । यहाँ पछिल्लो २४ घण्टामा ५ सय ९६ जनाको मृत्यु भएको छ । 
यसैगरी बेल्जियममा ५ हजार ६ सय ८३, मध्यपूर्वी एसियाली मुलुक इरानमा ५ हजार १ सय १८, जर्मनीमा ४ हजार ६ सय ४२, नेदरल्याण्डसमा ३ हजार ६सय ८४, ब्राजिलमा २ हजार ४ सय ६२, टर्कीमा २ हजार १७, स्विटजरल्याण्डमा १ हजार ३ सय ९३ जनाले ज्यान गुमाएका छन् ।
कोरोना भाइरसको उदगमस्थन चीनमा संक्रमणबाट ज्यान गुमाउनेको संख्या ४ हजार ६ सय ३२ पुगेको छ । यहाँ नयाँ सक्रमित र मृतकको संख्या पछिल्लो समय स्थिर रहेको छ ।