कोरोनाः अमेरिकामा मृत्युहुनेको संख्या ४० हजार नाघ्यो

८ बैशाख, हेटौंडा । विश्वव्यापी महामारीको रुपमा फैलिरहेको कोरोना भाइरस अर्थात कोभिड १९ को मार खेपिरहेको अमेरिकामा संक्रमणबाट एकैदिन १ हजार ५ सय ३४ जनाको ज्यान गएको छ । 
विश्वका सबैभन्दा बढी मानिसको मृत्यु भएको अमेरिकामा यो सँगै कुल मृत्यु हुनेको संख्या ४० हजार ५ सय ५५ पुगेको छ ।
कोभिड १९ को तथ्याङक प्रस्तुत गरिरहेको वल्डोभिटर वेबसाइटका अनुसार अहिलेसम्म अमेरिकामा ७ लाख ६३ हजार ८ सय ३६ जना कोरोना भाइरसबाट संक्रमित भएका छन् । यहाँ १३ हजार ५ सय ६६ जनाको अवस्था गम्भिर रहेको छ ।
पछिल्लो २४ घण्टामा मात्रै यहाँ २५ हजार ५ सय ११ जना नयाँ संक्रमित थपिएका छन् । यस्तै अमेरिकामा ७१ हजार १२ जना उपचारपछि स्वस्थ्य भएका छन् । 
अमेरिकाका पचास वटै राज्यमा कोरोना संक्रमण फैलिएकोमा न्युयोर्क राज्य सबैभन्दा बढी प्रभावित भएको छ । यहाँ अहिलेसम्म १८ हजार २ सय ९८ जनाको ज्यान गएको छ भने २ लाख ४७ हजार २ सय १५ जना संक्रमित भएका छन । 
यसैगरी अमेरिकाको दोस्रो प्रभावित राज्यमा न्यूजर्सी रहेको छ । यहाँ ८५ हजार ३ सय १ जना संक्रमित भएका छन भने ४ हजार २ सय २ जनाको मृत्यु भएको छ । 
यस्तै अमेरिकाको मासाचुसेट राज्यमा ३८ हजार ३ सय १ जना संक्रमित छन भने १ हजार ७ सय ६ जनाको मृत्यु भएको छ । 
यसैगरी अमेरिकाका अन्य राज्यहरु मिचिगनमा २ हजार ३ सय ९१, लुसियानामा १ हजार २ सय ९६,  क्यालिफोर्नियामा १ हजार १ सय ७५, इलिनोइसमा १ हजार २ सय ९०, कनेक्टिकटमा १ हजार १ सय २७, पेन्सिलभानियामा १ हजार २ सय २७ जनाको मृत्यु भईसेकेको छ । 
कोरोना भाइरसको संक्रमणबाट अमेरिकाका अन्य राज्यमा पनि मृतक र नयाँ संक्रमितको संख्या दिनानुदिन बढीरहेको छ ।