नेपाल बैंकले ब्याजमा दुई प्रतिशतसम्म छुट दिने

७ जेठ, काठमाडौं ।  नेपाल बैंक लिमिटेडले ऋणीहरुलाई ब्याजदरमा दुई प्रतिशत बिन्दुले छुट दिने जनाएको छ । लकडाउनका कारण मारमा परेका उद्योगी, व्यवसायी तथा अन्य ऋणहरुलाई छुट दिने जनाएको हो । 
बैंकले गत चैत मसान्तमा कायम ब्याजदरमा दुई प्रतिशत बिन्दुले छुट दिने जनाएको छ । यस्तो छुट त्रैमासिक ब्याज, किस्ता तथा अन्य दैदस्तुर तिर्ने ऋणीको हकमा २०७६ पुस मसान्त तथा मासिक किस्ता, ब्याज तथा अन्य दैदस्तुर तिर्नेहरुको हकमा २०७६ फागुन मसान्तको त्यस्ता रकम तिर्न बाँकी भएका ग्राहकले चौथो त्रैमासभित्र कर्जा नियमित गरेमा समेत वैशाखदेखि असारसम्मको ब्याजमा २ प्रतिशत बिन्दुले छुट पाउने बैंकले जनाएको छ ।
२०७७ वैशाखमा किस्ता तिरिसकेका ग्राहकले पनि यस्तो छुट सुविधा पाउने र यसको हिसाब मिलान बैंकद्वारा गरिने नेपाल बैंकका प्रवक्ता प्रकाशकुमार अधिकारीले जानकारी दिए । यस प्रकारको छुट सुविधा प्रदान गर्दा कतिपय ग्राहकले बैंकको आधार दर बराबरकै अर्थात् ७।८२ प्रतिशतकै न्यूनतम ब्याजदर सुविधा प्राप्त गर्न सक्ने बताइएको छ ।
यसअघि नेपाल राष्ट्र बैंकले वैशाख १६ गते सूचना जारी गरी ब्याज छुट नपाउने भनी वर्गीकरण गरेका कर्जाका क्षेत्रबाहेक अन्य सबै कर्जामा छुट दिन निर्देशन दिइएको थियो ।