गढीगाउँपालिका र ईन्द्रसरोबरमा एमाले विजयी

३ जेठ, हेटौँडा । स्थानीय तह निर्वाचनमा मकवानपुर गढी गाउँपालिकामा एमालेले विजय हासिल गरेको छ । बुधबार विहान सम्पन्न मतगणना अनुसार गाउँपालिका प्रमुख र उपप्रमुख दुबैमा एमालेले विजय हासिल गरेको हो ।
एमालेकातर्फबाट गाउँपालिका प्रमुखमा विदुर हुमागाई विजयी भएका छन् । उनले ३८ सय १४ मत प्राप्त गरेका छन् । उनका निकटतम प्रतिष्पर्धी नेपाली कांग्रेसका दोर्जे लामा स्यांतानले ३६ सय ५३ मत प्राप्त गरेका छन् । त्यसैगरी, उपप्रमुखमा एमालेकै हर्कमाया रुम्बाले ३७ सय १७ मत प्राप्त गरेकी छन् भने निकटतम प्रतिष्पर्धी नेपाली कांग्रेसकी मनिला केसीले ३७०७ मत प्राप्त गरेकी छन् । 
मकवानपुरगढी गाउँपालिकाको वडा अध्यक्षमा नेपाली कांग्रेसले १,२,७ र ८ मा विजय हासिल गरेको छ भने नेकपा एमालेले ३,४,५ र ६ मा विजय हासिल गरेको छ । 
त्यसैगरी, ईन्द्रसरोबर गाउँपालिकामा नेकपा एमालेले विजय हासिल गरेको छ । एमालेको तर्फबाट प्रमुखमा जीवनकुमार लामाले ३२ सय ४ मत प्राप्त गरेर विजयी भएका छन् भने प्रतिष्पर्धी नेपाली कांग्रेसका विश्वलाल लामाले २३ सय ७३ मत प्राप्त गरेका छन् । उपप्रमुखमा एमलेकी उमाकुमारी लामाले ३१९० मत प्राप्त गरी विजयी भएकी छिन् भने प्रतिष्पर्धी नेपाली कांग्रेसकी लक्ष्मी डंगोलले २०८१ मत प्राप्तगरेकी छिन् ।
ईन्द्रसरोबरमा १ नम्बर वडामा नेपाली कांग्रेसले विजय हासिल गरेको छ भने २,३,४ र ५ नम्बर वडामा एमालेले विजय हासिल गरेको छ ।