दैनिक १ करोड ६ लाख लिटर पानी वितरण

१३ साउन, हेटौँडा । हेटौँडा खानेपानी बोर्डले आफ्नो सेवा क्षेत्रमा दैनिक १ करोड ६ लाख लिटर पानी वितरण गरेको जनाएको छ । बोर्डले विहिबार पत्रकार सम्मेलनमार्फत बार्षिक प्रगति सार्वजनिक गर्दै यस्तो जानकारी दिएको हो । 
बोर्डले नगरका पुराना वडा र थपिएका १६, १७, १८ र १९ नम्बर वडाका ८२ हजार जनसंख्यालाई खानेपानी उपलव्ध गराएको निमित्त कार्यकारी निर्देशक सुदर्शन ढकालले बताए । १२ हजार २ सय २३ धाराबाट दैनिक सरदर ६ घण्टा पानी वितरण भईरहेको उनको भनाई छ । हेटौँडा–१६ मयुरधापमा रहेको मयुरधाप खानेपानी तथा सरसफाई उपभोक्ता समितिको १ करोड ६३ लाख लागतको खानेपानी योजना समेत आव २०७२÷०७३ मा बोर्डमा हस्तान्तरण भएको छ । 
सामरी खोला किनारमा ३५ सय लिटर प्रति मिनेट पानी उत्पादन गर्न सक्ने नयाँ सम्व वेल र बुङदल मुहानको स्तरोन्नति गरेपछि विगत जस्तो बर्षायाममा धमिलो पानी आउने समस्या अन्त्य भएको बोर्डको दावि छ । बोर्डले अहिले भईरहेको २६.०७ प्रतिशत चुहावटलाई घटाउने लक्ष्य राखेको अध्यक्ष प्रताप विष्टले बताए । यसलाई २५ प्रतिशतमा झार्नका लागि चुहावट नियन्त्रण, छलि धारा निरुत्साहित गर्न नियमित अनुगमन गर्ने र यस्ता कार्य नियन्त्रणबाट प्राप्त जरिवानको २० प्रतिशत सम्बन्धित कर्मचारीलाई प्रोत्साहन स्वरुप उपलव्ध गराउने उनले बताए । 
बोर्डले आत्तकालिन स्थतिको निम्ति विलिङ रकमको १.५ प्रतिशत जगेडा कोषमा जम्मा गर्ने योजना बनाएको छ । पत्रकार सम्मेलनमा बोर्डका सदस्य इन्द्र नेपाल र कृष्ण धितालको सहभागिता रहेको थियो ।