हेटौँडा उपमहानगरपालिकाको बजेट २ अर्ब ८ करोड

१० असार, हेटौँडा । हेटौंडा उपमहानगरपालिकाले आगामी आर्थिक वर्ष २०७७/०७८ को लागि २ अर्ब ८ करोड ६६ लाख ३३ हजार रुपैंयाको बजेट ल्याएको छ । उपमहानगरपालिकाको सातौँ नगरसभामा हेटौँडा उपमहानगरपालिकाकी उपमेयर मिना लामाले आगामी आर्थिक बर्षको लागि नीति तथा कार्यक्रम कार्यान्वयनका लागि २ अर्ब ८ करोड ६६ लाख ३३ हजार रुपैंया बजेट विनियोजन गरेकी हुन् । 
बजेटमा पुर्वाधार विकास तर्फ ९७ करोड ९८ लाख ३९ हजार, आर्थिक विकास तर्फ ६ करोड ५३ लाख, सामाजिक विकास तर्फ ७२ करोड ७४ लाख ७९ हजार, वातावरण तथा विपद व्यवस्थापन तर्फ ४ करोड ७१ लाख १९ हजार र संस्थागत विकास तथा सेवा प्रवाह र सुशासन तर्फ ३ करोड ५४ लाख विनियोजन गरिएको छ । 
उपमहानगरले आन्तरिक श्रोतबाट २० करोड १४ लाख ७९ हजार रुपैयाँ, राजश्व बाडफाड बाट ५५ करोड ३ लाख ४४ हजार, प्रदेश सरकारको अनुदानबाट ८ करोड ३५ लाख ९८ हजार तथा संघीय सरकारको अनुदानबाट ९८ करोड ९९ लाख  र असार मसान्तसम्म खर्च नभइ बचत भएको २६ करोड १३ लाख ११ हजार रुपैयाँबाट खर्च व्यहोर्ने लक्ष्य राखेको छ । 
उपमहानगरका नागरिक कोरोना भाइरस संक्रमण भई मृत्यु भएको अवस्थामा मृतक परिवारलाई ३ लाख रुपैंया उपलव्ध गराउने जनाईएको छ । विद्यालयको भौतिक पूर्वाधार विकासका लागि २ करोड ३५ लाख, कोरोना उपचार कोषका लागि २ करोड ५० लाख, शहरी स्वास्थ्य केन्द्रका लागि १ करोड ८५ लाख रुपैंया विनियोजन भएको छ । सामुदायिक विद्यालयका छात्राहरुका लागि निःशुल्क सेनेटरी प्याड वितरणका लागि १ करोड ३ लाख रुपैंया विनियोजन भएको छ । 
उपमहानगरले

७ औ नगरसभा मार्फत अग्रज पत्रकारिता पुरस्कारबाट नेपाल पत्रकार महासंघ मकवानपुरका पुर्व अध्यक्ष नवराज शर्मा,विकास पत्रकारिता पुरस्कारबाट पत्रकारहरु प्रकाश दाहाल,सुवास बिडारी, सुदिप शिवाकोटी, सरिता दाहाल सुरेश श्रेष्ठ र कृृृष्णा उदास खनाल सहित विभिन्न महानुभाव र  सेवानिवृत भएका कर्मचारीलाई सम्मान गरेको थियो । कार्यक्रम बागमती प्रदेशका मूख्यमन्त्री डोरमणि पौडेलको प्रमुख आतिथ्यतामा भएको थियो ।