नेकपा बागमती प्रदेश संसदीय दलमा योजना ‘अपहरण’ को चर्चा

१६ असार, हेटौंडा । नेकपा बागमती प्रदेश संसदीय दलमा योजना अपहरणको चर्चा चलेको छ । सांसदहरुले मन्त्रीले आफुहरुको योजना ‘अपहरण’ गरेको भन्दै आक्रोश पोखेका हुन् । 
मूख्यमन्त्री र सिमित मन्त्रीको मात्रै योजना परेको र सांसदहरुको योजना मन्त्रालयको कार्यक्रम विवरण पुस्तिकामा नपरेको भन्दै संसदीय दलको बैठकमा आक्रोश पोखेका छन् । उनीहरुले पटक पटक एकलौटी ढंगले योजना बाँडफाँड गर्ने गरेको भन्दै उनीहरुले मन्त्रीमाथि आक्रोश पोखेको एक सांसदले बताए । ‘अघिल्लो बर्ष पनि मन्त्रीका खल्तिबाट योजना ल्याईयो’, उनले भने–‘गल्ति भयो, अब त्यस्तो हुँदैन भनेर प्रतिवद्धता व्यक्त गरेपछि हामी ढुक्क भयौं तर फेरि उही कुरा दोहोरियो ।’ 
यसअघि नीति तथा कार्यक्रममाथिको छलफलमा समेत नेकपा सांसदहरुले कडा रुपमा आक्रोश पोखेका थिए । संसदमा नीति तथा कार्यक्रमप्रति श्रद्धाञ्जली समेत दिन संसदले भ्याएका थिए । उसो त नेकपाका मन्त्रीले बजेट बाँडफाँडबाट असन्तुष्ट छन् । आन्तरिक मामिला तथा योजना मन्त्रालयमा बजेट कम उपलव्ध भएको भन्दै मन्त्री शालिकराम जम्कट्टेल असन्तुष्ट छन् । उनी मातहतको प्रेस रजिष्टार कार्यालयलाई पनि पर्याप्त बजेट नभएपछि संचारकर्मीहरुले पनि आवाज उठाईरहेका छन् । 
नेकपामा सांसदहरुको आक्रोशको बचाउ गर्न केही सांसद लागि परेको स्रोतको दावि छ ।