सांसद तमाङ भन्छन्-'मन्त्रीहरूको हैसियत वडा अध्यक्ष भन्दा कम'

१६ असार, हेटौंडा । बागमती प्रदेशका प्रदेशसभा सदस्य प्रभात तमाङले सरकारले ५ लाखसम्म बजेट कार्यकर्ता र वडा अध्यक्ष सम्मलाई बाँड्न भ्याएको र कार्यक्रम पुस्तिकाको पाना संख्या बढाएकोमा धन्यवाद दिंदै व्यंग्य गरेका छन् ।
बिनियोजन विधेयकमाथिको छलफलमा बोल्ने क्रममा उनले रसुवाको जिबजिबेमा ५५ फिटे शिबको मूर्ति निर्माणको लागी आफूले प्रस्ताव गर्दैगर्दा मन्त्रालयले यो पटक मठमन्दिर र मूर्तिलाई बजेट विनियोजन नगर्ने भन्ने मन्त्रीको जबाफ दिएकोमा कार्यक्रम पुस्तिकामा मन्त्रीको निर्वाचन क्षेत्रमा मूर्ति निर्माणको शीर्षकमा बजेट बिनियोजन भएको बताए । उनले नियमले मिलेसम्म मन्त्रीले आफ्नै सालिक निर्माणमा समेत बजेट विनियोजन गर्न पछि नपर्ने भन्दै कटाक्ष गरे ।
रसुवामा रहेको रसुवा जिल्ला अस्पताल र जिबजिबे ग्रामीण अस्पताललाई सरकारले पूर्ण रूपले उपेक्षा गरेको भन्दै रसुवा जिल्ला सामाजिक बिकास मन्त्रालयको कार्यक्षेत्र अन्तर्गत पर्छ कि पर्दैन भन्दै प्रश्न गरे । सांसद तमाङले प्रदेश सरकारले गरेको डिपिआरले ३५ करोड अनुमानित लागत रहेको आयोजनामा १ करोड मात्रै  विनियोजन गरेको भन्दै यहि अवस्था आयोजना सम्पन्न गर्न ३५ वर्ष लाग्ने बताए ।
मन्त्रीहरू आफनै वडामा मात्र बढी बजेट विनियोजन गर्नु र ५ लाखसम्मको रकम राख्नुले प्रदेश सरकारको मन्त्रीहरूको हैसियत वडा अध्यक्ष भन्दा कम रहेको पुष्टि भएको बताए ।