नेपाली कांग्रेसका सांसदले सोधे-'बजेट नेताको दाइजो हो?'

१६ असार, हेटौंडा । बागमती प्रदेशको प्रदेशसभामा नेपाली कांग्रेसका सांसदले सरकारले ल्याएको विनियोजन विधेयकको चर्को बिरोध गरेका छन् ।
संसदमा विधेयकमाथि छलफल गर्दै उनीहरूले विनियोजन विधेयकको विरोध गरेका हुन् ।
बैठकमा सांसद छिरिङदोर्जे लामाले मूख्यमन्त्री कार्यालयको बजेटमा भवन मर्मत सम्भार शिर्षकमा ५ करोड छुट्याए पनि कुन भवन उल्लेख भएको भन्दै कसको भवन भनेर प्रश्न गरे । उनले सडक फराकिलो पार्ने क्रममा मूख्यमन्त्रीको घर पुनर्निर्माण गर्ने भए खुलाउन आग्रह गरे ।
सांसद निमा लामाले मूख्यमन्त्री कार्यालयको बजेटमा अतिथि सरकार र राजकीय सम्मान शिर्षकमा २० लाख बजेट राखेको प्रति आपत्ति जनाउँदै राजा नै नभएको बेला के को राजकीय सम्मान भन्दै प्रश्न गरे ।
सांसद न्हुक्षेनारायण श्रेष्ठले बजेट नेता र मन्त्रीमुखी भएको र संसदमा छलफल नहुँदै मन्त्रीका स्वकीय सचिवले योजना फेसबुकमा सार्वजनिक गरेको प्रति आपत्ति जनाए । सांसद बलराम पौडेलले समानुपातिक सांसदलाई उपेक्षा गरेको गुनासो गरे । सांसद मिलनबाबु श्रेष्ठले कोरोनाको जोखिम रोक्न फजुल खर्च कटौती गरेर पिसिआर कीट खरिद गर्नुपर्नेमा बजेटले त्यसलाई सम्बोधन नगरेको बताए ।
सांसद पुकार महर्जनले बजेट मैले ल्याएको भन्दै सांसदहरू गाउँगाउँमा हिडिरहेको बताउँदै बजेट नेताको दाइजो हो भन्दै प्रश्न गरे । ५ लाखसम्मको टुक्रे योजना ल्याएर बजेट मन्त्रीमुखी र चुनावमुखी भएर सरकारले ल्याएको भन्दै विरोध गरे ।