किन मागे नेकपा सांसदले मूख्यमन्त्रीको राजिनामा ?

१९ असार, हेटौंडा । बागमती प्रदेशका प्रदेशसभा सदस्यहरुले मूख्यमन्त्री डोरमणि पौडेलको राजिनामा माग गरेका छन् । हेटौंडामा चारसम्म चलेको नेकपा संसदीय दलको बैठकमा असन्तुष्टी पोख्दै सांसदहरुले संसदीय दलका नेता समेत रहेका मूख्यमन्त्री पौडेलको राजिनामा माग गरेका हुन् ।
सांसदहरुले सरकार संचालन प्रभावकारी नभएको, बजेट कार्यान्वयनमा असफल भएको, आगामी आर्थिक बर्षको बजेट समेत मूख्यमन्त्री र मन्त्रीमुखी भएको लगायतका आरोप लगाउँदै राजिनामा मागेका छन् । ‘सरकारको कार्यसंचालन प्रभावकारी नभएको र जनताको अपेक्षा पुरा नभएको कुरा सांसदहरुले उठाउनु भयो’–एक सांसदले भने–‘यस्तो अवस्थामा मूख्यमन्त्रीले सरकारको नेतृत्व गर्ने नैतिक धरातल गुमाउनुभयो भन्ने सांसदहरुको भनाई हो ।’ उनले केही सांसदहरुले राजिनामा दिएर मार्ग प्रशस्त गर्न मुख्यमन्त्रीलाई बैठकमा सुझाव दिएको बताए ।
पार्टीको घोषणापत्र अनुसार समाजबाद उन्मूख बजेट निर्माणमा सरकार असफल भएको भन्दै सांसदहरुले सरकारको बिरोध गरेको नेकपाका सांसद पशुपति चौलागाईले बताए । ‘सरकार प्रभावकारी संचालनमा ध्यान दिन नसकेको स्पष्ट पारेका हौं, राजिनामा विषय केही साथीहरुले उठाउनु भयो तर अहिले नै त्यसतर्फ हाम्रो ध्यान छैन ।’–उनले भने । बैठकमा मूख्यमन्त्री डोरमणि पौडेल र मन्त्रीहरुले बजेटमा छुटेका विषयलाई समेटेर लैजाने प्रतिवद्धता व्यक्त गरेका थिए । बैठक बिहिबार सकिएको छ ।