कुनै पनि परिस्थितिमा अहिले कांग्रेस सरकारमा जाँदैन: प्रबक्ता शर्मा

२२ असार, हेटौंडा । प्रमुख प्रतिपक्षी दल नेपाली कांग्रेसले कुनै पनि परिस्थितिमा यो कार्यकाल सरकारमा सहभागि नहुने प्रष्ट पारेको छ ।
पार्टीको केन्द्रिय कार्यसमिति बैठकका विषयमा जानकारी दिन आयोजित पत्रकार सम्मेलनमा प्रवक्ता विश्व प्रकाश शर्माले यो या त्यो जुनसुकै परिस्थिति उत्पन्न भएपनि अहिलेको कार्यकाल कांग्रेस मन्त्रालय चलाउने मानसिकताले सिंहदरबार नछिर्ने स्पष्ट पारेका छन् ।
सत्तारुढ नेकपाभित्रको विवाद र प्रतिपक्षी दलका नेताहरुसँग बाक्लिएको भेटघाटको सन्दर्भमा कांग्रेसले कुनैपनि हालतमा अहिले सरकारमा सहभागि नहुने प्रष्ट पारेको हो ।
प्रधानमन्त्री केपी शर्मा ओली लगायत नेकपाका अन्य नेता र कांग्रेस सभापति शेरबहादुर देउवाको भेटपछि विभिन्न अड्कबाजीका चलिरहेको थियोे ।
कांग्रेस प्रवक्ता शर्माले प्रधानमन्त्रीका राम्रा प्रस्तावलाई हामीले रमाइलोका रुपमा हेरिरहेका उल्लेख गर्दै प्रधानमन्त्री ओलिले देउवा नै कांग्रेसको अन्तिम प्रधानमन्त्री हुन् भनेर दिएका अलोकतान्त्रिक अभिव्यक्ति सम्झिरहेको बताए ।
उनले प्रधानमन्त्रीका गुलिया प्रस्तावमा नलहसिने बताउदै जनताले काङ्ग्रेसलाई ५ वर्ष प्रतिपक्षमा बस्न म्याण्डेट दिएको स्पष्ट पारे ।
कांग्रेस सरकारमा जान लाग्यो की भन्ने आशंकामा नरहन पनि उनलेे पार्टीका कार्यकर्ताहरुलाई आग्रह गरेका छन् ।