हेटौंडामा पूर्वएमालेको काउन्टरमा पूर्वमाओवादीले पार्टी कार्यालय घेर्दै

सांकेतिक तस्विर

२३ असार, हेटौंडा । हेटौंडामा पूर्वएमालेको काउन्टरमा पूर्व माओवादीले मंगलबार नेकपा मकवानपुर पार्टी कार्यालय घेर्ने भएको छ । 
पूर्वएमालेको एक खेमाले सोमबार ओलीको पक्षमा हेटौंडामा र्याली निकालेपछि रुष्ट पूर्वमाओवादी पक्षधरले नीति र विधि प्रधान पार्टी निमार्णका लागि भन्दै 'एकताका लागि दबाब अभियान, मकवानपुर' को नाममा दवाबमुलक कार्यक्रम गर्न लागेका छन् । 
उनीहरूले विहान ११ बजे पार्टी कार्यालयमा उपस्थित हुन आह्वान गरि सामाजिक सञ्जालमा प्रचार गरिरहेका छन् । प्रचार सामग्री कुनै नेताको फोटो देखिंदैन । अहिलेसम्म पूर्वएमालेकै ओलि इतर खेमाको यसमा समर्थन छ वा छैन स्पष्ट भएको छैन । यसको प्रचार अहिलेसम्म पूर्वएमालेको माधवकुमार नेपाल खेमाले गरेको पाइएको छैन । 
उसो त ओली-प्रचण्ड 'जुंगा'को लडाइँमा नेपाल खेमाका जिल्ला तहका नेता कार्यकर्ताले करिव मौन बस्ने रणनीति लिएको देखिन्छ । पूर्वएमालेको ओली निकट विद्यार्थी र युवाहरूले उनको समर्थनमा सोमबार हेटौंडाको बुद्धचोकमा  'कम्युनिष्ट युवा बिद्यार्थी मकवानपुर ' को व्यानरमा प्रदर्शन गरेका थिए । व्यानरमा ओलीको फोटोमात्रै थियो । 
केही नेकपा नेता भने दुबै पक्षको अहिलेको गतिविधिले एकता नभई फुटलाई बल पुग्ने भन्दै चिन्ता व्यक्त गरेका छन् । 'जिवन्त पार्टीमा यस्ता समस्या आइरहन्छ र समाधान पनि हुन्छ'-एक नेताले भने-'यस्तो गतिविधिले पछिसम्म मनमुटावको अवस्था सिर्जना गर्छ ।' यसले पार्टी अझै नामले मात्रै मिलेको सन्देश जाने भन्दै पार्टीका शुभेच्छुकले सामाजिक सञ्जालमा दुबै पक्षलाई संयमताका लागि आग्रह गरिरहेका छन् ।