नेकपाको गुटबन्दीको प्रभाव मकवानपुरसम्म, दुई नेताले दिए राजिनामा

२५ साउन, हेटौंडा । सत्तारुढ नेपाल कम्युनिष्ट पार्टीको विवाद मकवानपुरसम्म आईपुगेको छ । केन्द्रमा प्रधानमन्त्री केपि शर्मा ओली र अर्का अध्यक्ष पुष्पकमल दाहालसहितको गुटबन्दीको प्रभाव मकवानपुरमा पनि परेको हो ।

शनिबार भएको एक कार्यक्रमबाट मकवानपुरमा नेकपाको गुटबन्दी सतहमै देखिएको छ । शनिबार मकवानपुर इन्चार्ज समेत रहेका नेकपा केन्द्रीय सदस्य एवं प्रतिनिधिसभा सांसद बिरोध खतिवडा, मकवानपुर अध्यक्ष मुनु सिग्देल, सचिव प्रेमबहादुर पुलामी सहितका प्रचण्ड–माधव नेपाल पक्षधर नेताहरुको उपस्थितीमा प्रेस संगठन मकवानपुरको भेला गरेपछि नेकपा मकवानपुरको विवाद सतहमा आएको छ । 

केन्द्रमा प्रचण्डसहितले आफु निकट पत्रकारहरुको भेला गरे लगतै जिल्लामा यस्तो भेला भएपछि नेकपाका दुई जिल्ला नेताले राजिनामाको घोषणा गरेका छन् । नेकपाको प्रचार विभाग र नेकपा निकट पत्रकार हर्ने दुई जिल्ला नेताले पदबाट राजिनामाको घोषणा गरेर गुटबन्दी भएकाले राजिनामा दिएको खुलेर बताए । सामाजिक सञ्जाल फेसबुकमा लेखेर नेकपा मकवानपुरका प्रचार विभाग प्रमुख नविन सिग्देल र नेकपा आवद्ध प्रेस संगठनका इन्चार्ज देवराज रिमालले राजिनामा घोषणा गरे ।

सिग्देलले लेखेका छन्–‘नेकपा मकवानपुरको प्रचार विभागबाट सार्वजनिक राजिनामा गरे अनुकुलको मान्छे ल्याउनोस् तर अपराध नगर्नुहोस्, मैले सुनेको राति राति लेख्छन् रे, तर मलाई गुट चलाउनु पनि छैन, गर्नेले गरोस् ।  जोजो ल्याउन पर्ने ल्याओस्, म प्रचार विभागबाट विदा भएँ । म ईमान्दारपूर्वक हिडेको हो, अब गुट गर्ने ले जिम्मा लियोस् ।’

त्यस्तै, रिमालले लेखेका छन्–‘नेकपा मकवानपुरको प्रेस संगठन इन्चार्जबाट सार्बजनिक राजिनामा।कार्यार्थ जिल्ला कमिटी , बोधार्थ जिल्ला भन्दा माथिका कमिटी हरु।’ उनीहरुले यो समाचार तयार पर्दासम्म पार्टीमा औपचारिक राजिनामा भने बुझाएका छैनन् ।दुई युवा नेताले सामाजिक सञ्जालमा सार्वजिक रुपमा यसरी राजिनामा घोषणा गर्दा गलत भयो र सहि भयो भन्नेहरु पनि बाँडिएका छन् । मकवानपुरमा गुटबन्दीको शूरुवात भने केपि शर्मा ओलीले देशभर आफ्नो पक्षमा जुलुस निकाल्न निर्देशन दिएपछि केपि ओलीको पक्षमा मकवानपुरमा निस्किएको जुलुसबाट भएको थियो । त्यसको काउन्टरमा अर्को पक्षले पार्टी कार्यालयमा ज्ञापनपत्र बुझायो । त्यस लगतै तत्कालिन एमालेमा माधव नेपाल निकट मानिने पुष्पलाल मित्रता केन्द्रको जिल्ला भेला गरेर अर्को पक्षलाई गुटको प्रभावबारे सन्देश दिइयो । यो कार्यक्रमको बारेमा पनि पक्ष विपक्षमा बहस भयो । 

यही बिचमा ओली निकट भनिने मदन भण्डारी स्र्पोटस् एकेडेमीले हेटौंडा–५ मा कार्यक्रम गर्यो । अर्को पक्षले यसको श्रृंखलाको रुपमा शनिबार पत्रकारको भेला गर्यो । त्यस्तै, साउन ३० गते पुष्पलाल मित्रता केन्द्रले रक्तदान कार्यक्रम गर्दैछ । 

तर नेकपाका बहुसंख्यक कार्यकर्ता भने दुबै पक्षको शक्ति प्रर्दशनको होडबाजीको विरुद्धमा छन् । उनीहरुले पार्टीलाई मिलाएर अघि बढाउन दुबै पक्षलाई यस्ता गतिविधि नगर्न सुझाव दिएका छन् ।