प्रधानमन्त्रीलाई भेटेर देउवाद्वारा गम्भीर ध्यानाकर्षण

सांकेतिक तस्विर

१ भदौ, काठमाडौं । नेपाली कांग्रेस सभापति शेरबहादुर देउवाले प्रधानमन्त्री केपी शर्मा ओलीसँग बालुवाटारमा भेटवार्ता गरि विभिन्न विषयमा ध्यानाकर्षण गराएका छन् ।
देउवाले सिन्धुपाल्चोकको जुगल गाउँपालिकाको लिदिमा गएको पहिरोमा परेर दर्जन बढी जनताको ज्यान गएको, कयौँ बेपत्ता भएको घटनामा देउवाले प्रधानमन्त्रीको ध्यानाकर्षण गराएका छन् ।  गाउँबासीले १० दिन अघि देखि नै गुहार गर्दा पनि तिनलाई सुरक्षित स्थानमा सार्न सरकारले ध्यान नदिनु अत्यन्तै दुःखद भएको भन्दै यो गम्भीर गल्तीको जवाफदेहिता सरकारले लिनुपर्ने बताएका थिए । 
देशभर बाढी पहिरोले जनधनको क्षति गरेको भएपनि सरकारले सन्तोषजनक काम नगरेको, कोरोनाबाट संक्रमण हुने र मृत्यु हुने क्रम बढेकोप्रति ध्यानाकर्षण गराउँदै यस्तो विपदमा प्रभावकारी र व्यवस्थित रणनीतिका साथ काम गर्न सुझाव दिएका थिए । 
देउवाले त्रिभुवन विश्वविद्यालयमा देखिएका विवाद र विसंगति रोकिनुपर्ने, प्रजातन्त्रवादी प्राध्यापक संघको सभापति लगायतलाई मुद्दा लगाउने, राखिएका जायज मागहरुको सुनुवाइ नगर्ने, किर्तिपुर देखि ठाकुरराम क्याम्पस सम्मका कतिपय विद्यार्थीलाई थुनामा राखिएको विषयमा आपत्ति जनाउँदै विकृति सुधार्न र पक्राउ परेकालाई तत्काल रिहाई गर्न प्रधानमन्त्रीको ध्यानाकर्षण गराएका थिए ।