सांसद सिग्देल भन्छिन्-'गौरीटार आइसोलेसनमा दरिलो व्यवस्थापन टिम भएन'

५ भदौ, हेटौंडा । हेटौंडा-६ गौरीटारमा सेवा लिइरहेकाहरूले भोगेका समस्याबारे प्रदेश सांसद मुनु सिग्देलले मुख खोलेकी छन् । शुक्रबार विहान फेसबुकमा लेख्दै नेतृ सिग्देलले गौरीटार आइसोलेसनमा दरिलो व्यवस्थापन टिम नभएको बताएकी हुन् ।
उनले मदन भण्डारी स्वास्थ बिज्ञान प्रतिसष्ठानद्वारा संचालन गर्ने गरि हतार हतार यो आइसोलेसन संचालनमा ल्याइएको बताउँदै प्रयोगविहिन अवस्थामा रहेको भवनमा हतारमा प्रयोगमा ल्याउँदा समस्या आएकोे बताईन् ।  
स्वास्थकर्मी बाहेक आन्तरिक ब्यबस्थापनको लागि अधिकार सम्पन्न दरिलो ब्यबस्थापनको टिम नहुँदाको परिणाम दिनदिनै देखिएको उनको भनाई छ । उनले सामाजिक संजालमा फोटो खिचाउने होडबाजी मात्रै चलेको र स्थानीय जनप्रतिनिधिले आफुलाइ बेवास्ता गरिएको गुनासो गरेको बताइन् । 
उनले 'त्यहाँ दिनरात खटिएर कस्ले काम गरिरहेको छ ? दरिलो ब्यबस्थापन टिम किन बन्न सकेन ? स्थानीय  सरकारलाई कसरी सभागी गराइएको छ ? स्थानीय जनप्रतिनिधि र  नागरिक समाजलाई नजिकबाट सहयोग गर्ने बाताबरण कसरी बनाउने ? जस्ता प्रश्न तेर्स्याएकी छन् । उनले सबै नागरिक समाज, मिडिया, सरकार र प्रतिनिधि जिम्मेवार बन्न सुझाव दिंदै सबैले सबैलाई सहयोग गर्नसक्ने बाताबरण सिर्जना गर्नुपर्नेमा जोड दिएकी छिन् ।
आइसोलेसन वार्ड गौरीटारमा सारेदेखि नै कहिले खाना, कहिले खानेपानी, शौचालय र बत्ति त कहिले स्वास्थ्यकर्मीको दुर्व्यवहारको समस्या सेवा लिनेहरूले भोगिरहेका छन् ।