बानियाँले भने-'म कोरोनाबाट सुरक्षित छु, सबैसंग हातेमालो गरि अघि बढ्न प्रतिबद्ध छु'

७ भदौ, हेटौंडा । नेपाली कांग्रेस बागमती प्रदेश संसदीय दलका नेता एवं मकवानपुर सभापति इन्द्रबहादुर बानियाँले आफू कोरोनाबाट सुरक्षित रहेको बताएका छन् ।
नेपाली कांग्रेस मकवानपुरका विभिन्न तहका नेता र कार्यालयमा कार्यरत कर्मचारीमा कोरोना लागेसंगै उनलाई समेत कोरोना भएको आशंका गरिएको थियो । उनले सामाजिक सञ्जाल फेसबुकमा नेपाली कांग्रेस एवं आफ्ना शुभेच्छुकहरूले स्वास्थ्यको बारेमा सामाजिक सञ्जालसहित विभिन्न माध्यमबाट चिन्ता एवं चासो व्यक्त गरिरहनु भएकोमा आभार व्यक्त गर्दै आफू अहिलेसम्म म कोरोनाबाट सुरक्षित रहेको अवगत गराएका छन् ।
उनले लेखेका छन्-'विश्व अहिले कोरोना भाइरस (कोभिड-१९) महामारीसंग जुधिरहेको छ । नेपाल पनि यो महामारीसंग जुधेर अघि बढ्दैछ । यसै सन्दर्भमा नेपाली कांग्रेस एवं मेरा शुभेच्छुकहरूले मेरो स्वास्थ्यको बारेमा सामाजिक सञ्जालसहित विभिन्न माध्यमबाट चिन्ता एवं चासो व्यक्त गरिरहनु भएकोमा आभार व्यक्त गर्दै अहिलेसम्म म कोरोनाबाट सुरक्षित रहेको अवगत गराउँदछु । यो अवधिमा मैले संसद सुचारू रहँदा र अहिले गरी दुई पटक कोरोना परीक्षण गरेको र दुबै पटक नेगेटिभ रिपोर्ट आएकोले म सुरक्षित रहेको अवगत गराउँदै स्वास्थ्य सुरक्षा सावधानी अपनाउँदै आफ्नो दैनिकी सञ्चालनका लागि सुझाव दिन चाहन्छु । अन्तमा, देशबाट कोरोना संक्रमणको अन्त्यका लागि संघीय, प्रदेश, स्थानीय सरकार र सरोकारवाला सबैसंग हातेमालो गरि अघि बढ्न प्रतिबद्ध रहेको अवगत गराउँदछु ।'