हेटौंडा कोरोना ल्यावमा जाँचको तथ्यांक 'हरायो', केन्द्रमा पुगेन

७ भदौ, हेटौंडा । कोरोना संक्रमण जाँच गर्ने हेटौंडा-१० मा किटजन्य रोग अनुसन्धान तथा तालिम केन्द्रको प्रयोगशालामा संक्रमितको तथ्यांक 'हराएको' छ ।
स्वास्थ्य तथा जनसंख्या मन्त्रालयको नियमित ब्रिफिङमा हेटौंडा ल्यावले कोरोना जाँच गरेको पछिल्लो २४ घण्टाको नमूनाको संख्या नपठाएको बताएका हुन् । उनले हेटौंडा ल्यावले कोरोना संक्रमितको संख्या पठाए पनि जाँच गरेको नमूनाको संख्या पठाउन फेसबुक लाइभ मै ताकेता गरेका थिए ।
गौतमले ताकेता गरेपछि सामाजिक विकास मन्त्रालय र ल्यावमा खैलाबैला शुरू भएको छ । 'तथ्यांक कहाँ हरायो, कसरी छुट्यो भन्ने बारेमा खोजि शुरू भएको छ।'-एक स्वास्थ्यकर्मीले बताए ।
हेटौंडा ल्यावमा व्यवस्थापकीय कमजोरी रहेको शुरू देखि नै गुनासो आएपनि सुधारमा कुनै पहल भएको छैन । परिक्षणको दरमा पनि यो ल्याव ढिलो देखिन्छ । अन्य ल्यावले दैनिक संकलन भएका स्वाव जाँच गरि सार्वजनिक गरिरहँदा यो ल्यावमा ३/४ दिनपछि मात्रै रिपोर्ट आउने गरेको स्वाब संकलन गराएकाहरूको गुनासो छ । हेटौंडा ल्यावको कामको गति नबढेपछि भदौ ४ र ५ गतेको स्वाब काभ्रेको धुलिखेल पठाईएको जनाइएको छ ।
हेटौंडा ल्यावमा उपकरण मात्रै नभई जनशक्तिको समेत कमजोरी रहेको स्वास्थ्य क्षेत्रका जानकार बताउँछन् । यो ल्यावको स्तरोन्नति र जनशक्तिको समुचित व्यवस्थापन जरुरी रहेको उनीहरूको भनाइ छ ।